MPL Transfer - Chanmari West-in tlarhnung an thuam ṭha

Mizoram Premier League season 4-ah semifinal a awm tawh dawn a, MPL3-a palina Chanmari West FC tan thu lawmawm a ni. Chawngthangsanga enkawl hian season thar atan tlarhnung thuam ṭhain tawnhriat nei defender an la lut.

Chanmari West hian MPL2-a Luangmual FC final thlenpuitu defender Lalnunpuia , Mizoram Police FC aṭangin Vanneihtluanga , Bethlehem VT aṭangin Abraham Lalringngheta bakah vengchhung tlangval K. Lalmuanthanga te an ziak lut bawk. Durtlang Ab-a hi I League club ONGC leh Aizawl FC tana khel tawh a ni.

Chanmari West hian MPL3-ah goal 23 an chhuah a, an goal khung (goal 20) aiin a tam zawk. An hnuaia awm season thara an elpui ber tura ngaih Dinthar FC erawhin goal 18 chiah an chhuah a, tun season-ah Bethlehem Vengthlang FC leh Zo United FC (Reitlang FC) te an inthuam ṭhat bawk avangin tlar hnung thuam ṭhat hi a pawimawh takzet.

MPL3-a palina Chanmari West hian midfield-ah MPL1-a Dinthar champion puitu Zosangliana (Chhaia) leh Armed Veng South striker Lalrammuanpuia (2015 NECS Cup top scorer) te an la lut a, vengchhung player Reuben Vanlalpeka leh Lalremruata te an ziak lut bawk.

Forward-ah inkhel thlak danglam thei tur player an zawng mek a, vengchhung player H. Lalremruata chauh ziah luh thar a ni.

Chanmari West-in player thar an lakluh bakah an player neihsa chhuak an awm meuh lo a, chu chu MPL4-a an ṭhatna tur a ni. Keeper-ah Lalruatpuia leh Lalthanpuia an chelh bakah Ramhlun Venglai keeper Lalchhanhima an lak belh.

Defence-ah Benjamin Lal­chhuanawma, C. Ramdinmawia, H. Lalpeksanga, Lalrinchhana leh Malsawmzuala te; Midfield-ah Lalbiakhlua, Lallawmsanga, Vanlalbiaa Chhangte leh Zion Lalramluaha te; Forward-ah H. Lallianzama, Lalhmangaihzuala, Lalramliana leh Lalnunsanga te an kawl bawk avangin Chanmari West hi champion beisei ngam turin an ṭha tawk.

Chanmari West coach Chawnga chuan, "Player-te'n min chhuahsan lo a, vengchhung mipuiin min ṭawi­awm ṭhat bawk avangin season tharah beisei kan nei sang hle. Amah­erawhchu club dang angin sum kan thehchhuah tam theih loh avangin kan player duh kan chan nual thung," tiin a sawi.