Sports team zinga hlu ber Real Madrid
Forbes magazine chuan khawvela sports team zinga hlu ber a zirchianna a tichhuak a, Spanish football club Real Madrid aia hlu an awm lo.
Spanish La Liga club Real Madrid hlut zawng hi pound tluklehdingawn 2.08 niin pahnihnaah team pahnih an awm a, American football club Dallas Cowboys leh Baseball club New York Yankees te chu an hlut zawng pound tluklehdingawn 2.04 niin pahnihnaah hian an awmdun a ni.
Real Madrid hmelma kumhlun Barcelona chu palinaah awmin Catalan club hlut zawng hi pound tluklehdingawn 2.02 a ni. Kum 2014-a pathumna ni phak Manchester United chu panganaah an tla thla a, Premier League club hlun ber pawl hlut zawng hi pound tluklehdingawn 1.98 a ni.
Top ten-ah American sports club-in ro an rel a; NBA club Los Angeles Lakers leh New York Knicks, NFL club New England Patriots leh Washington Redskins bakah MLB club Los Angeles Dodgers te chu top ten-ah hian an lang bawk a ni.
Forbes-in khawvel sports team hluzual 50 a thlanchhuah zingah hian Premier League club Manchester City chu 29 na niin an club hlut zawng hi pound maktaduai 890 a ni. Premier League champion lai Chelsea chu 31-na niin London club hlut zawng hi pound maktaduai 877 a ni a, 36-naa awm Arsenal hlut zawng chu pound maktaduai 839 a ni.
Europe aṭanga football club ni lo zinga lang awmchhun chu Formula One team Ferrari niin an hlut zawng hi pound maktaduai 865 a ni a, 32-naah an awm.
Top 50-a lang sports team ho hlut zawng hi semrualin pound tluklehdingawn 1.12 ang ṭheuh a ni.