Khatla-in Champhai an ngam

Sharda University Mizoram Super League X-ah Khatla TBL-in ngamtu an la tawng lo - Thawhlehni zan khan Champhai Basketball Club chu an buzawlah an luhchhuah a, 76-61 in an hneh.

Khatla hian match li an khelh tawhah hnehna an la chang vek a, Champhai hma hian Bungkawn LB Associates (97-67), Zarkawt BCA (85-80) leh Zemabawk BC (97-95) an hneh tawh bawk - Khatla mipuiten champion an mitthla ṭan der a nih pawhin dem theih an ni lo.

Vanlallawma Indoor Stadium (VANIS), Champhaia inkhelah khawtual club Champhaiin thlawptu an nei ṭha a, quarter khatna Khatlain la nghal mah se, 17-18 chauh a ni a, an inhnaih rem rem hle.

Mahse, inkhel boruak a sang ṭan chiah tihah Khatla TBL-in an tawnhriat neih ṭhatna an chhawr ṭangkai nghal a, quarter hnihna 21-10 ngawtin an la a, quarter thumna chu 23-17 in an la bawk.

Champhaiin mahni muala tlawm duh loin thapui an thawh a, quarter lina chu 17-14 in an la. Mahse, quarter hnihna leh thumnaah Khatla an phak lohna a sang hret a, a tawpah an tlawm.

Khatla tan foreign leh state pawn player langsar rual karah Emmanuel VL Awmpuia bawk a langsar a, point 27 ngawt score-in, ani aia score sang zawk an awm lo - Khatla tan Vanlalṭhazuala (13) leh K. Lalthianghliama (11) ten an thlawp ṭha viau bawk.

Champhai tan khawtual mipui hmuh châk Dee Franklin a langsar a, American tlangval hian point 24 ngawt a score - Lalropuia (14) leh Lalsangliana (12) ten pui ṭha thawkhat mah se, Khatla 'meuh' hneh tur chuan a tawk zo lo a, an khawtuala MSL khelh hmasak berah Champhai an tlawm.

Zanin dar 7:00-ah MSL hi khelh chhunzawm tur a ni a, Zemabawk BC leh Bungkawn LB an inkhel ang - Zemabawk hian match hnih khel tawhin vawi khat an chak a, vawi khat an tlawm. Bungkawn hi match hnih an khelh tawhah an tlawm ve ve thung.