Reliance hnathawh zinga mi Abawihi

Reliance-in Mizoram football hmasawn nan hna ṭhahnem tak an thawk a, Naupang League bakah Reliance Foundation Youth Sports (RFYS) hnuaiah inelna hrang hrang kalpui a ni leh bawk. Chung zinga hlawkpuitu zinga mi chu B. Lalhmingthangi (Abawihi) a ni.

B. Lalthanpuia leh J. Zamliani te fanu Abawihi hi April 1, 2011-a piang a ni a, kum 13 chauh a la ni nachungin Vengsang Hospital Veng, Champhai tleirawl hian tawnhriat a ngah tawh hle.

Champhaia neih RFYS 2024-ah khan Abawihi hian Under 15-ah match kua khelin goal 27 a khung a, top scorer bakah best player-a thlan a ni. Kum 2023-ah top scorer a ni tawh bawk.

Kum naupangtein Champhai district team-ah senior team tan a khel a, Serchhip (2023)-ah quarterfinal thlengin goal khat a khung a, Saitual (2024)-ah semifinal thlengin goal thum a khung.

National Sub Junior C'ship-ah nikum khan Mizoram tan a khel tawh a, nikum Subroto Cup Under 13-ah khan Shillong-ah qualifying khelin match rukah goal riat a khung a, best player-ah an thlang. Delhi-ah final round khelin quarterfinal an thleng a, match liah goal kua a khung.

Tun hnaia Ashmita Football League (U15) neih zawh takah khan SYS tan khelin match riatah goal nga a khung a, an champion. Womens League neih mekah SYS tan a khel a, Under 15 team-in senior inelna an hmachhawn avangin result ṭha an la nei lo thung.

Abawihi chuan, "Reliance hnuaia inelna ka hlawkpui a, foootball hi ei zawnna atana hman ka duh. Ka chhungte pawhin min tuipui a, lehkha zir ang thoin min tuipui a ni," tiin Vanglaini a hrilh a ni.