Eriksen-a'n Manchester United chhuahsan dawn

Christian Eriksen chuan tun nipui transfer-ah Manchester United a chhuahsan dawn a, Danish midfielder hian Premier League club dang zawm tumna a nei lo.

Kum 33 mi Eriksen hian nipui transfer inhawn rualin Red Devils-a a contract a hmang zo tawh dawn a, tun thlengin United aṭanga dawrna a la dawng rih lo.

Eriksen chuan, "Club lam aṭangin engmah ka la hre lo a, hetiang a nih chuan United-ah hian ka khel chhunzawm zel dawn lo a ni ang.

"Chona thar hmachhawn turin ka inbuatsaih mek a, a pawi tihna pawh ka nei chuang lo - ka kalna tur erawh sawi chian theih a ni lo," a ti a, Eriksen hian July 2022 khan Brentford aṭangin United hi a zawm a ni.

Denmark international hian Ajax aṭanga a professional zinkawng zawh ṭanin, Tottenham Hotspur-ah hming a chher leh a, Inter Milan a pawh a khel hman.

Mahse, Euro 2020-ah khan Denmark tana a inlan laiin, lung lam fel lo avangin a tlu a, a inkhelh theih loh reng hnuah, January 2022 khan Brentford chu thla ruk atan a zawm.

Brentford tana a khelh hnuah United a zawm a, inelna hrang hrangah match 99 khelhsak tawhin, goal sarih a khung a, assist vawi 17 a nei bawk - tun season bikah match 27 a khel a, goal li khungin, assist vawi li a nei.

Eriksen chuan, "Tun dinhmunah chuan England-a cham tumna ka nei lo a, USA-ah pawh ka kal rih lo ang. Europe-a inkhelh chhunzawm ka duh a, Denmark lama haw nan a la hma hretah ka ngai bawk.

"Ram pawn club-a khel turin hun ṭha tam tak ka la neiah ka ngai a ni," a ti a, Danish midfielder hian EPL a khel lo a nih pawhin European top five league zingah hun hman chhunzawm ngei a tum niin a lang.