Bengaluru an chak, relegation zone-ah AFC

I League-ah Thawhlehni khan Aizawl FC elpui SC Bengaluru-in an mualah Real Kashmir 3-2 in an hneh a, Bengaluru club-in relegation zone chhuahsanin Mizo club erawh relegation zone-ah an tla thla thung. Tun season-ah match thum khelh tur a la awm a, SC Bengaluru hian point 20 hmuin Aizawl FC-in point khatin an phak lo.

Bangalore Football Stadium-ah SC Bengaluru-in minute ngana lekah Thomyo L. Shimray hmangin an khung nghal a, Real Kashmir-in Gnohere Krizo goal hnih hmangin an lehthal. Real Kashmir tan Mizo tlangval Lalramdinsanga Ralte pawhin bul a ṭan a, champion beiseina an la neih avangin chak pawh an tum hle.

Mahse, tlak hlau Bengaluru tan Shravan Shetty leh Faslurahman Methukayil ten an khung belh a, second half ṭantirhah 3-2 a ni ta zawk. Mualneitu player Oinam Sanatomba Singh hnawhchhuah a ni a, player 10-a an khelh hnuah goal venhim hna thawk zuiin SC Bengaluru-in point thum an hlawh chhuak.

Aizawl FC-in March 24, Thawhṭanni tlai dar 4:30 hian Dempo SC an tlawh dawn a, inkhel pawimawh bik a ni dawn. Mizo club hian Goan club hian nimin khan Churchill Brothers an hmachhawn a, result kan hre hman lo - Dempo hi an dinhmun a him bik lo. Victor Lalbiakmawia hote hian Dempo bakah Shillong Lajong leh Namdhari te an la hmachhawn ang. An elpui SC Bengaluru hian Gokulam Kerala, Namdhari leh Sreenidi Deccan te an la hmachhawn dawn.