Canadian Grand Prix an sawn
Coronavirus vanga buaina chuan ziaawm lam a la pan hleithei lo. Canadian Grand Prix pawh a hun sawn a ni a, inelna neih theih hun tur hi tih chian theih a la ni rih lo.
Montreal-a inelna hi ruahman dan chuan June 14-a neih tur niin a la hla ang reng hle. Mahse, inelna buatsaihtu lam chuan tunlai boruak an thlir a, tlan kawng leh hmunhma buatsaihna kawngah hnathawh chak theih a nih loh avangin thutlukna hi an siam hma.
F1 hi March thlatira ṭan tum tawh kha a ni, amaherawhchu Covid-19 vangin an la ṭan thei lo. Inelna neih hmasak tur pakua chu hri leng hian a tibuai ta a, a reh mai lo a nih chuan hmun dangah pawh harsatna a thlen zui a rinawm.
Canadian GP buatsaihtu lam chuan thuchhuah siamin, "Thutlukna siam harsa tak chu a ni. Thla hmasa khan Formula 1 thuneitu leh sumdawnna lama kan thawhpuite nen pawh kan in be pawp reng a, loh theih lohna avangin a hun sawn hi a ngai ta si," an ti.
Car intlansiakna sang berah hian world championship nei tur chuan a tlem berah intlansiak pariat tal a awm a ngai. Kumina inelna an neih theih beisei hnai ber chu June 26-a tlan tur French Grand Prix a ni a, calendar a inhnawh chep chho hle tura ngaih a ni.
F1 chairman leh CEO ni bawk Chase Carey chuan, "Canadian Grand Prix a hlawhtlin theih nan khan kan theihtawp kan chhuah. Amaherawhchu tun dinhmunah mitin tana ṭha zawk tur ngaihtuah a ngai," a ti.
Thuneitu lam chuan world championship hi neih theih an la beisei reng a, team hotute nena inbe rawnin calendar pawh sawr zim mai an rawt tawh, thuneitu ṭhenkhat zingah season hman loh mai duh tawk an awm bawk.