Moses-a awmna Chanmari an chak

Sharda University Mizoram Super League khelh laiah Chanmari chuan Saron lakah 86-80 in hnehna an chang a, an chak theih nan player tawnhriat ngah Moses Zoremmawia a langsar hle.

Nilaini zan Vanlallawma Indoor Stadium, Champhaia inkhelah team pahnih an inbei tawk a, hmahruaitu pawh an in nih chhawk zak zak - Saron hian an san fal lai berin point 18 ngawta kal fal lai pawh an nei.

Mahse, Mission Veng Vikings tana lo vul tawh ṭhin Moses-a leh a ṭhian te an zam lo, ani hian point 10 a neih bakah rebound vawi 11 lain double-double a nei a, an chak theih nan a thawhhlawk hle.

Moses bakah hian point 19 neitu Malsawmtluanga, Lalnunsanga (11 points) leh American player Gregoryshon Magee (28) te chu an chakna hnar a ni, hnehna hlu tak nen Champhai boruak an hip tihna a ni.

Zanin hian champion lai Zarkawt BCA leh Bungkawn LB te an inhmachhawn ve leh thung dawn - BCA hian beisei angin inelna tir lam an hmang ṭha tawk lo, an nomawi humhim an duh a nih chuan chetsual fo a remchang tawh lo.

Lalrina Renthlei, Matthew Remtluanga Sailo leh Zonunsanga te neitu an nih avangin BCA hi dah hniam theih an ni lo a, an khelh fuh ṭum chuan team ṭha dang pawh hneh turin theihna an nei, chutihrualin kum danga an boruak ang erawh an la nei phak bik loh avangin Bungkawn tan beisei tur a awm.