Doncic hoin Lakers an chak

Los Angeles Lakers chuan nimin zing khan Denver Nuggets chu 120-108 in an hneh, an thiampuipa Luka Doncic chuan point 31 neiin mimal mellung pawimawh a phun nghal bawk.

Crypto.com Arena-a inkhelah, kum 26 mi Doncic hian quarter hmasa berah point 21 a nei tling nghal a, basketball inelna lian NBA huangah match 200 ngawt mai point 30 neih tlinna a nei ta.

Slovenian tlangval Doncic chuan, "Ni danga ka sawi tawh ang bawk khan hun duhawm a ni, ka tan chuan ni thar apiang hi a duhawm zual zel a ni ber. A pawimawh zawk erawh chu a zawna vawi thum kan chak ta hi a ni," tiin a sawi.

Kumin February khan Doncic hian Dallas Mavericks aṭangin Lakers hi a zawm a, tun dinhmunah Western Conference table-ah pathumna an ni mek a, NBA champion nih an tum ngam ang.

Nimin zing inkhel dangah Eastern Conference hmahruaitu Cleveland Cavaliers chu Sacramento Kings lakah 123-119 in an chak lo, playoff khel tura an tlin hnuah an che fuh lo, a zawnin vawi thum an tlawmna a ni.