Tuchel enkawl England inlan dawn

Zanin dar 1:15 hian England chuan World Cup qualifier khel turin Albania an lo mikhual dawn a, coach thar Thomas Tuchel enkawlna hnuaiah eng angin nge an khelh dawn tih chu mipui hriat châk a ni.

Gareth Southgate enkawlna hnuaiah khan Three Lions hi an champion teuh ṭhin, mahse nomawi chawi erawh an harsat. Tochel-a hoin World Cup atan an inbuatsaih chho dawn a ni a, a bul ṭan fuh chu an duhthusam a ni ngei ang.

Group K-ah England hi Albania, Andorra, Latvia leh Serbia te nen an awmkhawm a, vawi hnih ṭheuh an inkhel kual ang; an player neih dan chhhut chuan Three Lions hi chungnung fal tura ngaih an ni.

Hliam vangin Bukayo Saka koh theih a ni lo a, forward ṭha Cole Palmer chu a inhnukdawk bawk - Manchester City forward Phil Foden chuan season a hmang ṭha tawk lo bawk, tun hnaia khel ṭha Marcus Rashford tan hun ṭha a nih a rinawm.

Captain Harry Kane a inpeih a, Bayern Munich striker hian goal khung a harsat lo; mual sir lam aṭangin tuin nge thlawp ang tih chu hriat chakawm a ni. Rashford bakah hian Anthony Gordon leh Jarrod Bowen te chu a sir lamah an awm thei ang.

Declan Rice leh Jude Bellingham an inkawp theih dawn avangin midfield lai chu an ngaihtuah awm loh a, tlarhnungah pawh buaina an nei lo tura ngaih a ni. Mahse, si ban nghal turin Jordan Pickford aia ṭha sawi tur mumal an la nei lo hi an buaina a ni thei.

Everton goalkeeper Pickford hi player ṭha pangngai tak chu a ni, mahse European ram lian dangte keeper nena khaikhin chuan a buk a rit tawk lo deuh; Dean Henderson nen bul ṭantu zawk nih an inchuh thei viau dawn niin a lang.

England tana ngaihṭhatna tur erawh chu FIFA hnuaia inelna lianah hian qualifying an khelh hnuhnung 31 zetah tlawm an nei lo, vawi 23 tehmeuh an chak thei - European ram zinga record nei ṭha ber an nih avangin Albania tan Wembley Stadium luhchhuah chu a harsa dawn.

Albania hian world number 10 chin ram vawi 19 an hmachhawn tawhah chak an la nei ngai lo a, vawi 17 zet an tlawm avangin an tan point khat lek pawh hmuh a harsat a rinawm, zaninah point khat an hmu thei a nih chuan an lawm khawp ang.

England squad

Goalkeepers: Dean Henderson (Crystal Palace), Jordan Pickford (Everton), Aaron Ramsdale (Southampton), James Trafford (Burnley).

Defenders: Dan Burn (Newcastle United), Levi Colwill (Chelsea), Marc Guehi (Crystal Palace), Reece James (Chelsea), Ezri Konsa (Aston Villa), Myles Lewis-Skelly (Arsenal), Tino Livramento (Newcastle United), Jarell Quansah (Liverpool), Kyle Walker (AC Milan, loan from Manchester City).

Midfielders: Jude Bellingham (Real Madrid), Eberechi Eze (Crystal Palace), Jordan Henderson (Ajax), Curtis Jones (Liverpool), Declan Rice (Arsenal), Morgan Rogers (Aston Villa).

Forwards: Jarrod Bowen (West Ham United), Phil Foden (Manchester City), Anthony Gordon (Newcastle United), Harry Kane (Bayern Munich), Marcus Rashford (Aston Villa/Manchester United), Dominic Solanke (Tottenham Hotspur).