Bayern tan Muller a rinawm
Thomas Muller chuan Bayern Munich tana a rinawmzia lantir nan contract thar a ziak a, club nen an inremna tharah chuan German champion tan hian kum 2023 thleng a khel chhunzawm ang.
Kum 30 mi Muller hian 2008 khan Bayern tan a match hmasa ber a khel a, player pawimawh a ni chhunzawm. Tun hnaia contract ziak hlim coach Hansi Flick pawhin a forward hi a chhawr rim a, inremna an nei thei hi thu lawmawm a ni.
Kumin January bazar lai khan Muller hi chhuak tur angin thawm a ri ring hman hle. European club lian dangte chuan an ngaihven hman viau, mahse tunah erawh Allianz Arena-ah hun rei zawk a cham dawn.
German club Bayern chuan, "Contract tharah hian club leh player kan lawm tawn hle, hlawhtlinna duhawm chan chhunzawm theih pawh kan beisei," an ti. Muller pawhin Bayern tana hun rei zawk a khel thei tur chu a lawm thu a sawi ve bawk.
Bayern tan Muller hian match 500 chuang a khel tawh a, Bundesliga nomawi ringawt pawh vawi riat a chawi tawh. DFB-Pokal vawi nga bakah Champions League leh Club World Cup te pawh a lakpui tawh.
Season kal laiah pawh Bayern hian match 25 khelh tawhah hma an hruai mek, an elpui Dortmund aiin point liin an sang zawk. Hri leng vanga hun rei tak an chawlh hnuah training an zawm leh tawh a, nomawi humhim theih pawh an beisei.