April 12-ah ISL khel zo dawn

India rama club football inelna sang ber, Indian Super League chu April 12-ah khelh zawh a ni dawn ta a - ISL hi league round khelh zawh tawh a ni a, league round-a point hmu sang ber Mohun Bagan chuan ISL Shield an dawng fel tawh.

Bagan hian season hmasa khan ISL Shield hi an lo la tawh bawk a, ISL chanchina season zawna league champion ni thei hmasa ber an ni. Mahse, season hmasa khan final-ah Mumbai City an ngam lo a, ISL Cup chu Mumbai club-in an hawn.

ISL-ah hian league round zawhah ISL Cup khelh leh a ni ṭhin a, top six chinten season hmasa aṭang khan ISL playoff hi an khel ṭan. League round-a a sang pahnih chu semifinal khel turin an tling nghal a, Bagan leh FC Goa te an ni.

Table-a pathumna aṭanga paruknaten playoff hmangin semifinal khel tur hi an zawng ve leh ṭhin a, tun season-ah chuan Bengaluru, NorthEast United, Jamshedpur leh Mumbai City an ni.

March 29, Inrinni zanah playoff match hmasa ber khelh a ni dawn a, pathumna Bengaluru leh parukna Mumbai City an inhmachhawn ang. Inkhelhna stadium hi table-a sang zawk khelmualah zel a ni a, Bengaluru hian an khelmualah Mumbai an mikhual dawn tihna a ni.

Playoff hi single leg-a khelh a nih avangin table-a a sang zawk nih hi a 'manhla' hle - Mumbai hian league round-a an match hnuhnung berah khan 2-0 in Bengaluru hi an hneh a, playoff-a an hmun tihchian nan an hmang. Bengaluru-in playoff-ah petchhuah a, phuba lak an tum ang.

March 30 zanah NorthEast United-in Jamshedpur FC an mikhual ve leh dawn thung. Highlander hian Jawaharlal Nehru Stadium, Shillong chu an khelmual atan an hmang dawn a, Meghalaya-in an khelmual neih ṭhat an vanneihpui zel - March international break-ah India inkhel match hnih chu an thleng tawh bawk.

Semifinal hi April 2-7 inkarah khelh tur a ni dawn a, double leg a ni dawn thung. April 2 zanah Bengaluru leh Mumbai inkhela chak zawkin FC Goa an mikhual ang a, April 6 zanah semifinal second leg khelin Goan club hi an lenchilh leh ang.

April 3 zanah NorthEast United leh Jamshedpur FC inkhela chak zawkin Mohun Bagan an mikhual ang a, April 7 zanah second leg khel turin Bagan khelmualah an inkhel ve leh thung dawn.

Final hi April 12 zanah khelh tur niin, final-a intum tur team-te khelhna tur stadium a la sawi theih loh - final lut team hnih aṭangin league table-a sang zawk zawk khelmualah final hi khelh tur a ni dawn. NorthEast leh Mumbai-in final lut dun ta se, Shillong-in ISL final a thleng thei dawn tihna a ni.