Churchill an chak, Inter Kashi an chesual

I League nomawi inchuh boruak a 'hot' a, sum hmang hnem Inter Kashi aiin club hlun Churchill Brothers-in pressure an ngam zawk. Nilaini khan Goa Derby-ah Churchill-in Dempo 3-1 in an hneh a, Inter Kashi erawh Sreenidi Deccan nen 2-2 in an inhnehtawk.

Churchill hian point 37 hmuin table-ah hmahruaitu an ni a, Sreenidi lakah point hnih hlohtu Inter Kashi-in point hnihin an pha lo. I League-ah match thum chiah khelh tur a awm tawh a, champion turin Goan club dinhmun a ṭha ta hle.

Churchill an vul

PJN Stadium, Fatorda-ah Churchill-in Dempo an ngam hrim hrim a, ṭantirh lamah Trijoy Savio Das-a'n chance ṭha a hlah nghal. Churchill-in an nawr chhunzawm a, minute 26-naah Aubin Kouakou-a'n khung lo mah se keeper tih per dangtu defender Mohamed Ali-a'n an lamah a ti lut.

Minute 35-naah Churchill striker Wayde Lekay-a'n Lamgoulen Hangshing ball pek chu cool zetin a pet goal belh a, 2-0 in hma an hruai. Dempo-in Argentine midfielder Damian Perez hmangin penalty an hmu a, Marcus Joseph-a'n a khung.

Churchill erawhin an hun ṭha neih an hlah lo a, minute 58-naah Wekay-a ball pek chu dinglam aṭanga tlan lut Stendly Fernandes-a'n a khung. Dempo-in minute 65-naah Shaher Shaheen hmangin siphurh sut ṭhen mah se goal dang hmuh tur a awm tawh lo a, Churchill 3-1 in an chak.

Inter an chesual

Churchill an chak avangin Inter Kashi tan chak a ṭul lehzual a, mahse Antonio López hote hi Antonio Lopez-ah an chesual a, Sreenidi nen 2-2 in an inhnehtawk.

Champion tum Inter Kashi-in bul pawh an ṭan ṭha a, minute 22-naah Sumeet Passi siam chu Prasanth Karuthadathkuni-a'n a khung nghal. Edmund Lalrindika telna team-in bul ṭan ṭha mah se mualneitu lam an insiamrem.

Sreenidi-in minute 48-naah Mizo tlangval Lalromawia cross chu David Castaneda-a'n a khung. Mizo player-te an che ṭha chhunzawm a, minute 72-naah Brandon Vanlalremdika'n hnai tak aṭangin a tauh lut. Brandon hi palian lo mah se amah vengtu feet ruk leh inch khata sang Spanish defender David Bollo-a'n a veng hneh chuang lo.

Lalromawia'n goal dang khung belhna remchang a khung lo a, Inter Kashi-in injury time-ah siphurh an sut ta thung. Bidyashagar Singh-a'n hnai tak aṭangin kawh zetin a pet goal a, 2-2 in inkhel a tawp.

Engtin zel?

Churchill hian point hnihin hma hruai mah se Inter Kashi nen hian March 30, Pathianniah an inkhel dawn. He inkhel hi champion zawnna tur a ni ang. Goan club hian Sreenidi leh Real Kashmir an hmachhawn dawn.

Inter hian Shillong Lajong leh Rajasthan te an mualah ve ve an la hmachhawn dawn a, mahse a pawimawh ber, Churchill Brothers nena an inkhel tur hi Goa-a khelh tur a ni thung.

Dempo SC chak lo pawhin relegation battle lamah nghawng a nei lian hle. Goan club hian March 24, Thawhṭanni tlai dar 4:30 hian Aizawl FC an mikhual dawn a, inkhel pawimawh bik a ni ang. Mizo club hi an chak a nih chuan Goan club chungah an awm ang a, relegation zone an chhuahsan ang.