Spurs enkawl leh ka châk - Pochettino

Tottenham Hotspur manager hlui Mauricio Pochettino chuan London Hmarveng club chu enkawl leh a châk thu a sawi chhuak - Argentine coach hi a club hluiah a la kir leh lo ang tih a sawi theih loh.

Kum 53 mi coach hian 2014-19 inkar khan Spurs hi a enkawl a, nomawi chawipui lo mah se, 'Big Six' huang chhunga Spurs dahtu tih loh rual a ni lo. 2016-17 Premier League-ah khan pahnihna a nihpui a, League Cup 2015-ah final thlengin, kum 2019 khan Champions League final hial an khel bawk.

Mahse, November 2019 khan Spurs hian an ban a, Paris St-Germain leh Chelsea a enkawl zui a, September thla khan kum 2026-a World Cup thleng tur United States chu a enkawl zui.

Poch chuan, "Spurs ka chhuahsan tirha interview ka neih pakhat kha ka hre reng ṭhin a, tah pawh khan Tottenham-ah kir leh ka duh thu ka sawi. Mahse, tunah chuan USA coach ka ni a, kir leh lam sawi theih a ni lo.

"Chutihrual chuan kha thu ka sawi aṭanga kum ruk/kum nga liam hnuah pawh ka ngaihdan a la ngai reng. Engtikah emaw chuan Tottenham-ah hian kir leh ka duh a ni," a ti a, London club hi a hmangaih hman hle niin a lang.

Poch hian Spurs coach aṭanga ban ni mah se, amah bantu, club chairman Daniel Levy nen inhmuhthiam lohna an neih loh thu a sawi bawk. Kum 53 mi coach chuan, "Zep tur a awm lo. Kum ruk deuhthaw kan awm ho a, khatih hun chhunga kan thil tawn zozai avang khan inṭhen kha a hrehawm hle.

"Mahse, inhuatna engmah a awm lo. Professional kan nihna ang leh chumi piahlama kan nun chu dah hran thiam a ngai ve fo ṭhin. Tottenham ka chhuahsan lai ang tho khan kan inkar boruak chu a la ṭha reng a ni," a ti.

Poch hian Spurs a chhuahsan hnuah PSG enkawlin, Ligue 1, Coupe de France leh Trophee des Champions-ah te champion nomawi a chawipui. Hemi hnu hian Chelsea a pan leh a, League Cup final hruai thleng mah se a champion pui lo a, FA Cup-ah semifinal thlengin, Premier League-ah parukna an ni.

Argentine coach hian season khat hnuah Blues hi a chhuahsan a, Poch chuan, "Kan beisei anga thil a thleng lo a nih chuan tawp mai a, thil dang thlirte pawh a fuh ve ṭhin - kan pahniha tan inṭhen kha a ṭha a ni," a ti a, Stamford Bridge-a a hun hman chungchang a sawi.

Poch chuan, "Chelsea leh kei khan inṭhen kan pawi ti lo ve ve a, kan beisei ang ngeiin, a khawi lam lamah pawh chona thar hmachhawn tur a awm nghal," a ti - Stamford Bridge-a chhuahsan khan England nen sawizawm a ni a, mahse, Three Lions hi tunah chuan Thomas Tuchel-a'n a enkawl.

Espanyol leh Southampton pawh lo enkawl tawh Poch chuan, "England national team enkawl theihte chu thil châkawm tak a ni a, mahse, a chang chuan kan inpeih hun hi a innang fuh lo ve ṭhin," a ti a, Three Lions enkawl tur khan a inpeih hman loh thu a sawi.

Poch chuan USA a enkawl chhan sawi zuiin, "Kum 2026-a World Cup thleng tur USA enkawl kha thil châkawm tak a ni. A bik takin kei leh ka coaching staff, club football hlira hun lo hmang ṭhin tan chuan chona phurawm tak a ni a, sawmna a lo thlen khan, lo pawm mai kha a harsa lo hle a ni," a ti a, Spurs-ah kir duh mah se, USA-ah a la hlim rih e.