Europe rama World Cup qualifier kalphung

FIFA World Cup 2028 chu nakkum June 11 - July 19 chhungin Canada, Mexico leh United States-ah khelh a ni dawn a, zanin aṭangin Europe-ah chuan World Cup khel tur zawnna ṭan a ni ang. Europe bikah chuan March 1, 2026-ah World Cup khel tur ram a hriat fel ang.

Nakkum World Cup-ah hian ram 48 an inel tawh dawn a, Europe-in quota ngah berin ram 16 tan hmunruak a awm. World Cup khel tur an tam sawt dawn a, ram ṭha tan kawng a inhawng zau lehzual turah a ngaih theih.

Kalphung chu

UEFA hnuaiah ram 55 an awm a, hrem vangin Russia an tel lo. Ram 54 chu group 12-ah ṭhen sawm an ni a, group A-F ah ram pali awmin group G-L ah ram panga an awm thung. Group tin aṭang hian a sang ber chu World Cup khel turin an tling ang.

Hmunruak pali a la awm a, hetah hian group tin aṭanga pahnih ṭheuh bakah hian 2024–25 UEFA Nations League-a ti ṭha palite an tel bawk ang. Tuna playoff khel chiang ram palite chu Spain, Germany, Portugal leh France te an ni.

Chutihrualin heng ramte hi qualifier-a pakhatna emaw pahnihna emaw an nih chuan qualifier hmangin World Cup an tling nghal thei a, playoff khel turin a tling nghal thei bawk. Ram ṭha pali hi qualifier hmanga tling nghal thei an ni a, an aiawh tur thlan danah pawh ruahmanna a awm sa.

Qualifier-a pakhatna emaw pahnihna emaw ni lo aṭangin thlan tur a ni a, Nations League-a an ranking en mai tur a ni ang. Playoff khel tur ram 16 te chu an ṭhat dan mila thliar an ni ang a, pali zelin group paliah ṭhen an ni ang. Group tinah hian semifinal leh final a awm ang a, heta chak ber zel hi World Cup khel turin an tling dawn a ni.