Milan-ah Silva a kir dawn?
Paris Saint-Germain defender Thiago Silva chu a club hlui AC Milan lamah a kir leh mai thei niin a agent Paulo Tonietto chuan a sawi a, football-ah chuan thil thleng thei lo tak tak a awm loh thu a sawi bawk.
Kum 35 mi Silva hian Paris club lian tan hian season kal lai tawp thleng daih bak hi contract a nei tawh lo. Ligue 1 champion nen inbiakna an la nei rih lo a, contract thar a ziak lo a nih chuan a duh lam a hawi thei ang.
Brazilian centre-back hian 2011 khan Milan chu Serie A nomawi a lo chawipui tawh a, a hnuah PSG zawmin Ligue 1 lamah a hlawhtling hle a, player pawimawh leh rinrawl a ni bawk.
Tonietto chuan, "Thil thleng thei lo tak tak hi a awm lem lo, chutihrualin hma hun hi ngaihtuah uluk a ngai a, hri leng a zawh hunah kan thutlukna chu a hriat ang.
"Milan khawpui nawmzia leh fans an ṭhatzia a hre chiang a, tun thlengin a lung lentu a la ni reng," tiin a sawi. PSG lamin chhuah zalen pawh ni se Milan lama kir leh tur chuan Serie A club-in hlawh ti hniam lo chuan an lak duh a rinawm tawh loh.
Silva hian Paris club tan hian league nomawi paruk a chawi tawh a, title a lak zawng zawng belhkhawm chu 14 zet a ni tawh. Season kal laiah pawh Ligue 1 hmahruaitu an ni a, Champions League quarterfinal an lut tawh bawk.