Pulev-a'n Joshua a hmachhawnna sum hman ṭangkai a tum
Bulgarian boxer rothap Kubrat Pulev chuan Anthony Joshua nen an inhmachhawn huna a hlawh tur aṭangin 50% chu coronavirus do nan a hman tur thu a sawi a, a sum hmuh tur zat hi pound maktaduai li chuang ni tura ngaih a ni.
Boxer pahnih inhmachhawn hun tur hi a tirah chuan June 20 tih ni mah se a hun sawn a ni a, Premier League hma hun a chian theih rih loh avangin Tottenham Hotspur Stadium-a inhnek tur hi a hun tur tak tih chian theih a la ni rih lo.
Kum 38 mi Pulev chuan, "Doctor, nurse leh damdawi in te chu he hri leng darh zel tur an dona kawnga an hman tur atan hmanrua ka pe dawn a ni. Joshua nen kan inhnek aṭanga ka hlawh 50% chu rim taka he hri leng doa thawkten an hman ṭangkai turin ka pe ang," a ti.
Pulev hian Joshua-a kawnghren kawl lai - IBF, WBA, WBO leh IBO heavyweight title chu chhuhsak a tum dawn a, a sawi ang hian a hlawh aṭanga 50% hi a pe a nih chuan a tlem berah pound maktaduai hnih tal chu Covid-19 do nan a thawh dawn tihna a ni.