Sipaiah Son-a ṭang dawn!
Tottenham Hotspur striker Son Heung-min chu an ram dan anga kar li chhung sipaia ṭang turin South Korea-ah a kir a, London club chuan an striker hian a duty-te a tih zawh hun May-ah club a zawm leh tur thu an sawi.
South Korea sorkar danah an ram mi leh sa te chuan kum 28 an tlin hmain an ram sipai tan service an nei ngei ngei tur tih a ni a, kum 27 mi Son hian ram tana a tih turte zawmin sipai hi a zawm dawn a ni.
Ram dan ang tak chuan South Korean mipa te hi thla 21 tal sipaia ṭang tura tih an ni. Mahse, Son erawh infiamna khawvela hming a chher avangin a vannei a, 2018 South Asian Games-ah khan South Korea tan football-a gold medal an lak avangin thla 21 hi kar liah an tih hniamsak.
July-a kum 28 tling tur Son hian sipai hi a zawm nghal mai dawn lo a, London aṭanga an ram pan a nih avangin kar hnih tal chu midang tlawh pawh loa inkhung hrang (quarantine) tura tih a ni.
Spurs tan tun season-a match 32-a khelh aṭanga goal 16 khung tawh Son hian February 16-a Aston Villa an hmachhawn ṭumin a banah hliam a tuar a, hemi hnu hian khelmualah a inlan leh tawh lo.
Thla hmasa khan Son hi inenkawl turin Spurs chuan an ram lamah hian an lo kir tir tawh bawk a ni.