East Bengal-in Omid Singh lalut?
Indian club ṭha East Bengal chuan Iranian winger Omid Singh chu Indian football-a inlan turin an lalut a, Indian thisen kai player hian kum hnih chhung atan Kolkata club-ah hian contract a ziak.
Omid Singh hian India tana a khelh theihna tur a nih chuan Iran khua leh tui nihna thlauh thlak mai a hnial loh thu a lo sawi tawh a, India coach Igor Stimac nen pawh inbiakna an neih tawh nia sawi a awm.
East Bengal hotu zinga mi Debabrata Sarkar chuan, "Tunah chuan Tehran-ah a awm mek a, contract hi kum hnih atan a ziak tawh a ni," a ti a, Iranian club Naft Masjed Soleyman F.C aṭanga an lakluhna zat hi puanzar a ni lo.
Omid Singh hi Iran rama league sang ber Persian Gulf Pro League-a khel lai a ni a, East Bengal thupuan hi kum 29 mi hian a dik tawk loh thu an ram media lamah a sawi thung.
Singh chuan, "Kan league kal zel dan tur ka thlir phawt a, chumi zawhah ka hma hun chu ka ti chiang ang," tiin Iranian media-te a hrilh a, Kolkata club-a contract a ziah loh thu a sawi.
Mahse, Vanglaini hriat danin Omid hian East Bengal-ah hian contract a ziak ngei a, Iranian league hi an la khelh zawh loh avangin puanzar a duh rih lo niin a lang.
East Bengal hian season thara ISL an khelh dawn leh dawn loh a la chiang lo a, mahse Kolkata club hian Omid thlem luh nan hian ISL-a an khelh tur thu an hrilh.