Premier League sum hloh tur a tam

Coronavirus hri leng vangin Premier League hi tiam chin awm loa chawlh mek a ni a, entu awm loa season tih tawp thlengin sawi rik ni tawhin an hma hun a chiang lo hle. 

Premier League chief executive Richard Masters chuan, "Tun season mai a ni lo. Season thar thlenga he hri leng hi a reh thei lo a nih chuan pound tluklehdingawn khat aia tam pawh hloh thei kan ni," a ti. 

England-a football thuneitu sang ber Football Association chairman Greg Clarke chuan, "Fans ṭhenkhat chuan an thinlung zawng zawnga an hmangaih club an chan mai thei a ni," tiin hri leng chuan football khawvel a nghawng nat thu a sawi. 

Premier League club leh player-ten tun hnaiah sawiselna an tawk nasa a, a bik takin sorkar scheme hnuaia non-playing staff-te hlawh 80% lak tir tum club-te chuan sawisel an tawk nasa hle. 

English top flight football club zingah Newcastle United, Tottenham Hotspur, Bournemouth leh Norwich City-te chuan he scheme hi an hman tur thu an tichiang tawh a, Liverpool chuan hman an tum ve thu sawi zet mah se sawiselna an tawh nasat avangin an thutlukna hi an sut. 

Premier League hotupa Masters chuan club-te chet dan hi chhanin Digital, Culture, Media and Sport committee chairman Julian Knight hnenah lehkha hi thawnin, "Scheme hi mi zawng zawng tana duan a ni. 

"Sum kan hloh avanga insiamrem dan ngaihtuah a ngai a, chutiang a nih loh chuan sum hmuh nana football hmangtute chu an tlachhe mai dawn a ni," a ti a, an hnuaia club-te a chhan. 

Premier League hotupain sorkar scheme hmangtu club-te chhan mah se Julian Knight rilru erawh a danglam phah lo. Knight chuan, "Premier League hian chhan theih miah loh club-te a chhan hi bansan rawh se. 

"A nihna ang taka ngaihtuah phei chuan a nuihzatthlak a, Liverpool chuan an fan-te thusawi ngaithlain an thutlukna an thlak a, an ti ṭha takzet a ni," a ti zui. 

Hetiang boruak karah hian FA chairman Clarke chuan FA Council meeting-ah thawhho pawimawh thu sawiin, "Football chu team anga khelh ṭhin a ni a, chutiang tak chuan kan thawh ho a ṭul a ni," a ti. 

FA hian Covid-19 vangin pound maktaduai 100 vel hloh tur angin an in chhut a, a bik takin Premier League hnuai lam club-ten an tawrh nasat avangin FA hotupa hian inpuih tawn theih dan a ngaihtuah a ni. 

English football season tawp dawn leh dawn loh thlengin tun hnaiah zawhna a piang nasa a, Premier League pawhin thutlukna mumal an siam thei meuh lo. 

Clarke chuan, "Promotion leh relegation thlenga ngaihtuah a ngaih avangin season hi khelh zawh ngei kan duh a, mahse kan ti thei kher lo mai theih. Football hi kan ngaih pawimawh ber a ni lo a, nunna hi a hlu ber chu a ni," tiin Covid-19 hri leng kara league zawh hram dan ngaihtuah chu a harsat thu a sawi. 

English FA hotupa chuan, "League hnuai lamah chuan season tih tawp mai a, thutlukna chu FA Council-a dah mai an duh tawh hial a ni," a ti a, champion, relegation leh promotion chu FA lamin an ngaihtuahna 'chance' a awm tihna a ni. 

Khawthlang media ṭhenkhat chuan season hi khelh zawh a nih loh pawhin Liverpool chu Premier League champion an nih tho tur thu an tarlang a, thu chiang erawh engmah a la awm lo.