Jail aṭangin Ronaldinho an chhuah
Brazil forward hlui Ronaldinho leh a unaupa Roberto Assis chu nimin khan jail aṭangin an chhuah a, 'house arrest'-in Paraguay-ah an awm chhunzawm ang.
March 6 khan Ronaldinho leh a unaupa hi passport lem an hman avangin Paraguay-ah man an ni a, khawvel huapa footballer hriat hlawh ni mah se dan angin jail-ah an khung. An man tirh hian 'bail' a chhuah phal a ni lo a, tunah erawh thubuai an chinfel hun nghah nan four-star hotel Asuncion-a awm an phalsak.
Judge Gustavo Amarilla chuan thutlukna a puan hian Brazilian star leh a unaupa bail chhuah nan hian $800,000 ve ve an pek thu a sawi. Paraguay lama thuneitute tarlan danin Ronaldinho te unau hi March 4, zing dar 9:05 khan Silvio Petirossi International Airport-ah an ṭum a, an passport chu dik mah se a chhung thu a dik lo.
Ronaldinho te hian an man hma hian lehkhabu ti lar tur leh naupang rethei zawkte pui turin Paraguay hi an pan a. Brazilian star ukil sawi danin Paraguay lama chah luttuten Paraguayan passport hi an buaipui a, Ronaldinho te unau hian dan an bawhchhia tih an inhre lo niin a sawi thung.
Kum 40 mi Ronaldinho hian Paris Saint-Germain, Barcelona leh AC Milan tan a khel tawh a, Catalan club hi La Liga-ah vawi hnih champion puiiin Champions League-ah nomawi a chawi pui. Brazilian star hian 2005 khan Ballon d'Or a dawng a, an ram Brazil hi Copa America (1999), FIFA World Cup (2002) leh Conderations Cup (2005) ah te a champion pui vek tawh a ni.