Bungkawn hnehtu Zemabawk

Sharda University Mizoram Super League chu Vanlallawma Indoor Stadium, Champhaiah khelh chhunzawm a ni a, team intiattawk tura ngaih pahnih inkhelah Zemabawk chuan Bungkawn LB Associates chu 91-63 in an sawp.

Ningani zan inkhelah Zemabawk an cheṭha hle a, point 31 tehmeuha fal lai pawh an nei a, hamrik hnuhnung a rik laia an san falna pawh point 28 a tling, an tan hna harsa a awm lem lo.

Zemabawk thiampuipa Kenneth J Perkins a langsar, American tlangval hian point 33 a neih bakah rebound ṭum 17 ngawt a la, an khingpui lamin basket an neih tur ṭum li dansak bawkin, a phu ang ngeiin Player of the Match atan an thlang.

Kenneth J Perkins chauh a ni lo - tualchhung player zingah Lalrozama (16 points) leh Vanlalrinchhana (10) te an cheṭha a, coach tawnhriat nei R. Liansangpuia enkawl an nih avangin an boruak a danglam.

Zemabawk coach Sangpuia chuan, "MSL X atan inbuatsaihna kan nei ṭha em em a, kan result pawh a ṭha chho viau. Club neitu lamin ruahmanna an siam hle a, court pawh kan duh hun kan chang ṭhin, chu chuan rah ṭha a chhuah a ni," tiin Vanglaini a hrilh.

Tun hma lamin Zemabawk hian MSL-ah sulhnu an nei lem lo, mahse kuminah team hmuhnawm zinga mi an ni. Bungkawn LB an hneh hma hian Champhai an hneh tawh a, an hneh loh awmchhun chu Khatla TBL niin, an chak loh ṭum pawh hian inthlauhna chu point hnih chauh a ni.

Nizan khan Champhai bika inelna chu an zo a, champion lai Zarkawt BCA leh Electric BC te inkhelin result kan hre hman lo. March 25, Thawhlehni zanah inelna hi Aizawlah chhunzawm leh tur a ni ang.