Boston Celtics man a tam turu

America rama sumdawng intelkhawm, mi hausa William Chisholm kaihhruai Symphony Technology Group chuan NBA champion Boston Celtics chu US dollar vaibelchhe 6.1 tehmeuhin an lei dawn, inremna an siam tawh.

Boston Celtics an leina tur hi North America bikah chuan infiamna huanga club an leina to ber a ni dawn, kum 2023 khan NFL club Washington Commanders chu dollar vaibelchhe 6-in an lo hralh tawh a, record hmasa hi tunah an rawn khum ta chiah.

Grousbeck chhungkua leh an thawhpui Steve Pagliuca te ta Boston Celtics hi team hlun leh ṭha tak an ni a, nikum khan Forbes chuan NBA team zinga a hlu zual palinaah an lo chhut tawh a, pakhatna chu Golden State Warriors an ni thung.

Tunah neitu thar nei mah se, kum 2027-2028 season tawp thleng chu Wyc Grousbeck-a chi Boston Celtics tan hian CEO leh governor a ni chhunzawm dawn a, thuneihna leh kalphung inhlanchhawn hun chu a hna a chelh rih dawn tihna a ni.

NBA regular season kal laiah Boston Celtics hian vawi 50 hnehna an chang tawh a, ṭum 19 chak loin Eastern Conference lamah pahnihna an ni mek, an chungah Cleveland Cavaliers chiah an awm.