Aizawlah MSL khel leh ta
Champhai khawpuiin MSL round khat a thlen hnuah, nizan aṭang khan Sharda University Mizoram Super League X chu R. Dengṭhuama Indoor Stadium, Mualpui, Aizawlah khelh ṭan a ni leh ta.
Zaninah pawh match hnih en tur a awm dawn a, tlai dar 5:30 hian Bungkawn LB Associates leh Saron Veng Basketball Club an inhmachhawn ang a, zanin dar 8:30 hian Zemabawk Basketball Club leh Chanmari Basketball Club an inkhel bawk ang.
MSL boruak tem tawh Bungkawnin tun season-ah beisei an phak lo a, match thum an khelh tawhah an la tlawm vek - Champhaiah chak beisei takin an zin a, mahse, Zemabawk BC chu 91-63 ngawtin an ngam lo!
Bungkawn tan Justin Sylver a che ṭha ṭhin a, Zemabawk lakah pawh khan point 39 ngawt a score! Mahse, a ṭhiante zingah point 10 score phak dang an awm lo a, Bungkawn tan result nei turin foreign player chet ṭhat ringawt a tawk lo - tualchhung player-ten mawhphurhna an lak ngam ve a ṭul.
Saron Veng pawhin hnehna chan an duh dawn. Anni hian match thum an khel tawh a, an match hmasa bera Elecric Veng BC an hneh bak kha an la chak leh lo - Zarkawt BCA leh Chanmari BC lakah an tlawm a, Bungkawn lakah insiamṭhat an tum dawn.
Chumi tur erawh chuan Lalmalsawma, T. Lalhriatzela, Abhisek Tyagi leh Frederick Elombi te an chet ṭhat a ṭul ang. Zanin dar 8:30-a Zemabawk BC leh Chanmari BC inhmachhawn tur hi en châkawm tak a ni bawk.
Chanmari hian match thum an khelh tawhah hnehna an la chang vek a, Zarkawt BCA, Electric BC leh Saron Veng an hneh tawh - Zemabawk lakah an zam lo ang tih a chiang a, US tlangval Gregoryshon Magee ringawt pawh ṭhatpui tham a nih tehlul nen Moses Zoremmawia, Lalnunsanga leh Pulkit Sachdeva te ho an la kawl tel.
Zemabawk pawh kai thar ni mah se, match thum khelh tawhah vawi hnih chak thei an ni a, inrintawkna an nei sang khawp ang - Champhaiah 91-63 in Bungkawn an hneh thei a, Chanmari an hlau dawn lo.
Kenneth Perkins Jr hian MSL nuam a ti viau a, match tina tal na ṭhin player hi Chanmari lakah a inthlahrung thut lo ang - Nitish Beniwal, Lalrozama leh Vanlalrinchhana te pawh Chanmariin an dah nau a nih ngat chuan an tisual ang.