Spain leh France an intawng dawn

Pathianni zan UEFA Nations quarterfinal second leg meuh chu hmuhnawm tak a ni - Portugal leh Germany bakah Spain leh France ten semifinal an lut ve ve a, team pahnih hi penalty hmangin an chak ve ve!

Spain-in Netherlands an hneh a, France-in Croatia an pet chhuak thung. La Roja leh Oranje te hi 3-3 in an inhnehtawk a, first leg-ah 2-2 a an lo inhnehtawk tawh avangin chak zawk an awm lo.

Penalty an pet zui a, Spain tan Lamine Yamal chuan a hlah - Netherlands tan Noa Lang leh Donyell Malen ten an hlah thung a, penalty-ah 5-4 a chakin champion lai Spain an tlang.

France-in Michael Olise leh Ousmane Dembele goal hmangin Croatia chu 2-0 in an hneh a, first leg nena belhkhawmin 2-2 a ni. Penalty an pet zui a, Les Bleus tan Jules Kounde leh Theo Hernandez ten an hlah laiin, Croatia tan Martin Baturina, Franjo Ivanovic leh Josip Stanisic ten an hlah a, France an tlang.

Spain 3-3 Netherlands

La Roja-in an mikhual Netherlands lakah vawi hnih ngawt hma an hruai a, Mikel Oyarzabal chuan goal hnih a khung - minute riatna lekah Oyarzabal hian penalty aṭangin a khung a, Netherlands-in penalty hmang vekin an sut.

Netherlands tana a match 100-naah Memphis Depay chuan penalty hmangin si phurh hi a sut a, mahse, Oyarzabal bawkin Spain hi hma a hruai nawnpui - Dutch team tana a match hmasa ber kheltu Ian Maatsen chuan minute 79-naah si phurh sut ve lehin, 2-2 a ni.

Extra time khelh zui a ni a, rawlthar danglam bik Yamal chuan mawi zetin minute 103-naah Spain hi hma a hruai nawnpui. Mahse, La Roja an ṭang rei thei ngang lo!

Kum 21 mi Xavi Simons chuan Spain keeper Unai Simons lakah penalty a hlawh chhuak a, si phurh a sut. A tawpah penalty hmangin result chinfel a ni a, European champion Spain chu a vannei zawkah an ṭang.

France an chak

First leg-ah France-in 2-0 in Croatia an ngam lo a, mahse, Stade de France-a an intawn meuh chuan an chak lohna zat chiahin an lo hneh let - penalty an pet zui a, a vannei zawkah an ṭang zui.

Mahni mualah France-in chak ngei tumin Croatia an nawr a, goal hlawh chhuak tur erawhin second half nghah thlen a ngai. Minute 52-naah Michael Olise a inlar a, yard 25 vela hla aṭangin freekick mawi zetin a chhuih lut.

France-in Croatia an nawr chhunzawm a, minute 80-naah an vannei leh ta nge nge. Season duhawm tak hmangtu Ousmane Dembele hun a inher chhuak a, Bayern Munich winger Olise siamsak chu goal-ah a chantir.

Les Bleus hian na takin an nawr chhunzawm a, Croatia goalkeeper Dominik Livakovic chet ṭhat zan ni lo se, penalty pet kher a ngai lo hial ang - Kylian Mbappe khung ngei tur nia lang vawi thum ngawt a dansak a, penalty-ah erawh France an vannei ta zawk.