Djokovic chak laiin Alcaraz a tla

Miami Open 2025 khelh laiah Novak Djokovic chu a thiam zual 16 zingah a inhlangkai, hetih lai hian a hmachhawn theih zinga mi Carlos Alcaraz erawh David Goffin hneh loin a zinkawng a tawp thung.

Nimin zing inkhelah Djokovic hian Camilo Ugo Carabelli chu 6-1, 7-6 (7-1) in a hneh. ATP Masters 1000 huangah match 411 a chak tling ta chiah a, a elpui ni ṭhin Rafael Nadal-a chak zat khumin a chung berah a awm.

Kum 37 mi Djokovic hian a vawi sarih nan Miami Open title lak a tum mek, a match lehpekah chuan Lorenzo Musetti a hmachhawn ang; Musetti hian inkhel dangah Felix Auger-Aliassime 4-6, 6-2, 6-3 in a lo hneh ve bawk.

Grand Slam vawi 24 champion tawh Djokovic chuan, "Champion sawi a la hun lo, ṭha taka kan khel a nih chuan title hi chu amah in a lo kal mai. A pawimawh ber chu ṭha taka match khelh theih a ni.

"Mi ṭhenkhat chuan world ranking chungchang min zawt ṭhin, mahse kei chuan ka ngaipawimawh ber lo. Engtin nge ṭha takin Grand Slam ka khelh theih ang tih chu a pawimawh ber," tiin a sawi.

Inkhel dangah Carlos Alcaraz chu David Goffin lakah 5-7, 6-4, 6-3 in a chak lo - Goffin hian darkar hnih leh minute 18 chhungin hnehna a chang - Spanish star Alcaraz hian a ranking tih san theihna remchang a neih chu a bawhpelh leh ta rih.

Seeded pakuana Stefanos Tsitsipas chuan 7-6 (7-4), 6-3 in American mi Sebastian Korda chu a hneh. Bulgarian tlangval Grigor Dimitrov chuan Russian mi Karen Khachanov chu 6-7 (7-3), 6-4, 7-5 in a hneh ve bawk.