IPL history-a vawm chhe ber Archer

Indian Premier League-ah England fast bowler Jofra Archer-a'n record duhawm loh a siam. Pathianni khan Sunrisers Hyderabad (286/6) in Rajasthan Royals (242/6) chu 44 runs in an hneh a, Royals bowler Jofra Archer-a'n record duhawm loh a siam.

English bowler Archer hian over li vawmin 76 runs an vuak sak a, wicket a la lo. IPL history-a match khata vawm chhe ber a ni. Rajiv Gandhi International Stadium, Hyderabad-a inkhelah hian Ishan Kishan chuan ball 47-ah 106 runs siamin mualneitu a chakpui.

Inkhel dangah Chennai Super Kings (158/6) chuan an mual MA Chidambaram Stadium, Chepauk-ah Mumbai Indians (155/9) chu wicket liin an hneh. Man of the match-a thlan Noor Ahmad chuan 18 runs chauh pein wicket li a la a, Chennai chakna kawngah a ṭangkai hle.