China-ah McLaren an chungnung

Season bul ṭan nia che fuh lo Oscar Piastri chuan a theihna tak a pholang - Pathianni tlaia tlan zawh tak Chinese Formula One Grand Prix-ah hnehna a chang.

Shanghai International Circuit-a intlansiakah Australian tlangval Piastri bakah hian amah ang bawka McLaren car khalhtu Lando Norris chu pahnihna a ni a, an team tan chuan intlansiak nuam leh ṭha tak a ni.

McLaren an chet fuh lai hian Ferrari tan erawh hun ṭha lo a ni. Lewis Hamilton-a car a skid block zinga pakhat chi a chhah tur ang aiin a lo pan zawk a, ani bakah hian Charles Leclerc leh Pierre Gasly te pawh car nih tur ang aia zang an khalh avangin an hrem.

Driver pathum hi an result hnawlsak an ni a, point hmu loin China ram an chhuahsan a ngai - Ferrari driver pahnih Hamilton leh Leclerc tan chuan hun duhawm lo, theihnghilh daih chakawm a ni hial ang.

Hnehna changtu Lando Norris chuan, "Vannei takin hnehna ka chang, tun ṭum kan intlansiak zet chu chhuan tur engmah ka nei lo, vanneihna chauh a ni," tiin a sawi a, midang chunga leng a ni bik lo tih a sawi bawk.

Champion lai Max Verstappen chu palinaah a thleng a, Dutch tlangval hian season hmasa chawhnu lam aṭanga elphaktu a neih kha a la danglam lo - kuminah pawh McLaren driver te nen an inum nasa dawn, season dang aiin an inum na dawn niin a lang.

A zawna vawi li champion thei Verstappen chuan, "Car chhunga ka luh tawh hi chuan thil dang ka ngaihtuah thei tawh ngai lo, a ṭha thei ang bera tlan hi ka tum tawp mai ṭhin, ka chhehvelah chuan engpawh thleng se ka buai phah lo.

"Intlansiak reng rengah hian awlsam taka hnehna chan theih a ni ngai lo, chu chu keimah chauh ni loin midang tan pawh a ni. Nikum a bul kan ṭan dan nen chuan a inang rih lo, mahse team ṭha kan nihna a lang leh ngei ang," a ti. Red Bull car khalhtu pakhat zawk Liam Lawson chu 12-na a ni.