Juventus-in coach an thlak

Thla kua chauh an in chhawr hnuin Juventus chuan an coach Thiago Motta an ban a, a hmunruak luah turin Croatian coach Igor Tudor an lakluh thu an puang chhunzawm nghal.

Player a nih laia Italy tana khel phak Motta hian beiseina sang tak nan Juventus a zawm a, mahse Allianz Stadium-ah beisei angin a che thei lo - Serie A champion vawi 36 ni tawh hi Champions League khel phak lo dinhmunah a awmpui mek.

Champions League aṭangin an tla a, nomawi an kawl lai Coppa Italia chu an hloh fel tawh bawk. Tun hnaiah Atalanta 4-0 a an ngam loh bakah Fiorentia lakah 3-0 in an tlawm bawk a ni.

Turin club tan chuan an dinhmun hi ngaihtuah tham a ni a, Italian champion vawi 36 ni tawh awmna atan chuan an dinhmun a hniam mah mah, anmahni aia squad pan zawk lakah an mualpho nasa bawk.

Juventus chuan Motta an mangṭha hnu lawkah Tudor an lak thu an puang - Tudor hian player a nih laiin kum 1998 aṭanga 2007 chhung khan Juve jersey a lo ha tawh a, match 150 chuang a khelhsak a ni.

Croatian international hlui hian inkhelh a chawlhsan hnuah team enkawl hna a thawk zui, a chawr chhuahna Hajduk Split chu kum 2013 khan a enkawl ṭan a, chumi hnuah - Galatasaray, Udinese, Hellas Verona, Marseille leh Lazio te a enkawl tawh bawk.

Juventus chuan thuchhuah siamin, "Thiago Motta-a'n kan first team enkawl hna a thawh chu a tawp ta, amah leh a coaching staff chungah an hnathawh te avangin lawmthu kan sawi," an ti. Old Lady hian an coach thar Igor Tudor chuan nimin aṭang khan hna a zawm tih an sawi bawk a ni.