Reds-in Shaqiri hralh phal lo

Liverpool chuan an midfielder Xherdan Shaqiri lalut tura dawrna dawng mah se an hnar a, inelna hmachhawn lai an ngah avangin squad tih pan an duh lo. 

Italian club ṭha AS Roma leh Spanish club Sevilla te chuan Shaqiri hi loan-a lakluh an duh a, mahse Merseyside club hian Switzerland international hi chhawr tam lo mah se Anfield aṭanga chhuahtir an phal lo a ni. 

Club pahnih hian loan-a lak phawta, a ngheta lei zui pawh an inhuam a, mahse Reds hian heti chung hian chhuahtir erawh an phal lo. 

Liverpool hian Premier League-ah hma an hruai mek a, Champions League leh FA Cup-ah beisei an la neih bawk avangin squad chhah neih hi an tih makmawh a ni. Liverpool hian July 2018 khan Stoke City aṭangin Shaqiri hi an lalut a, release clause pound maktaduai 13 lekin an lei. Nipui transfer-ah an hralh a nih chuan pound maktaduai 25.5 tal hmuh an inbeisei ang. 

Kum 28 mi midfielder hian season hmasa khan Champions League nomawi a chawi a, inelna hrang hrangah match 30 khelin goal ruk a khung a, assist vawi nga a nei bawk.  Tun season-ah erawh hliam vangin Shaqiri hian match 10 chiah a khel a, goal khat a khung.