May thla tirah Bundesliga khelh theih beisei
German Football League (DFL) chief executive Christian Seifert chuan Bundesliga chu May thla tir lamah an khelh chhunzawm theih a beisei thu a sawi a, inelna hi an nei leh a nih pawhin entu awm loa khelh a ngaih hmel.
German rama football inelna sang Bundesliga leh 2. Bundesliga te hi Covid-19 vangin April 30 thleng chawlh lailawk mek a ni. Club ṭhenkhat chuan tun kar Thawhṭanni aṭang khan training hautak lo deuh zawkin an kalpui leh tawh.
John Hopkins University-in a tarlan dan chuan German ramah coronavirus kai mi 110,000 chuang an awm tawh a, mi 2,100 chuangin an thihpui tawh bawk - Europe rama tuar na berte zinga mi an ni.
Seifert chuan a beiseina sawiin, "Mipui ten an nunphung pangngai an nei let ve leh thuai turah ngai ila, chumi hunah chuan Bundesliga pawh khelh chhunzawm leh a ni ang.
"Sorkar hmalakna kan puih theih dan ṭha ber chu thuawih a ni a, kan phak tawkah kan zawm ṭha vekin ka hria. League hi kan khel zo thuai thei a nih chuan European football lam atan rilru kan sawrbing hma thei dawn a ni," a ti.
DFL chief executive Seifert hian league kal lai an titawp a nih chuan Bundesliga club zinga pangate chuan sum lamah harsatna nasa tak an tawk thei dawnin a hria a, league hniam lam club phei chu a zatve velin an tuar na zual tura ngaih a ni bawk.
Bayern Munich chief executive Herbert Hainer chuan sum lama harsatna an tawk a nih chuan bazar na tih tlem a ngaih tur thu a lo sawi tawh. Seifert pawhin Hainer thusawi hi a ṭawmpui.
Seifert chuan, ""Hun rei lote chhung chauh bazarna hun a awm a nih chuan thil a buai nuaih thei. League ṭhenkhat chuan sum lamah harsatna an tawk lo a ni mai thei, keini erawh rim taka kan thawh chhuah hmang kan nih avangin inrenchem a ngai," tiin a sawi.