England an chak - lawm erawh a kim lo!
Thomas Tuchel-a hnuaia match hnih an khelhah England an chak ve ve - Three Lions hian Thawhṭanni zan khan Latvia chu 3-0 in an sawp a, World Cup qualifier match hnih an khelh aṭangin point ruk an nei ta.
England hian match hmasa zawkah Albania chu 2-0 in an lo hneh tawh a, Tuchel chu Fabio Capello (2008) hnua England coach, competitive match a hmachhawn hmasak pahniha chak ve ve thei hmasa ber a ni.
Three Lions tan Reece James, Harry Kane leh Eberechi Eze ten goal khat ṭheuh an khung a, Latvia lamin a chhanletna tur an neih loh avangin Wembley Stadium-ah England an chak.
Beisei phak lo
Latvia hi FIFA ranking-ah 140-na an ni a, England hi palina an ni thung! Hei ringawt pawh hian team pahnih inkar zauzia a pholang a, si thum ngawta an chak chunga Three Lions fan-te an lawm lo pawh hi a awm lo hran lo.
Wembley Stadium-ah Latvia-in an dinhmun an hrechiang a, 5-4-1 in an inrem! Goal khung lam an ngaihtuah phak lo a, an tum ber chu goal chhuah loh a ni tawp - hun rei tak chu an ṭang thei hial.
Minute 38-na a ni a, England-in goal an khung ta nge nge. September 2022 hnua a vawi khat nana Three Lions tana bul ṭan Reece James chuan goal hmangin England tana a bul ṭan a lawm a, Chelsea captain hian freekick hmangin mawi zetin a khung.
Kha le, Kane
England-in Latvia lakah goal khung an harsat a, an khung hmasak ber pawh set-piece aṭangin a ni! Fan-te lungawi lo thawi dam nan captain Harry Kane a inlar a, minute 68-naah an goal hnihna a khung.
Bayern Munich striker hian ram tan match 105 a khelhah goal 71 a khungna chiah a ni a, Three Lions tana goal khung tam ber ni ṭhin Wayne Rooney (53 goals) chu goal 18 ngawtin a khum ta.
Si hnih an chhuah hnuah Latvia an zuai a, hei hi Eberechi Eze chuan remchangah lain, ram tana a goal hmasa ber a khung zui. Goal dang lut loin England an chak a, lawm erawh a kim lo.
Hmasawnna
Albania lakah England-in game hmuhnawm an chhawp thei lo a, Latvia lakah a danglam lo. Tuchel hian, "Thatho taka inkhelh a, hnehna chan duha tuihal turin ka duh a ni," a ti a, mahse, German coach beisei ang thathona hmuh tur a awm meuh lo!
Chutihrual chuan Albania nena an inkhel aṭanga chhutin hmasawnna hmuh tur erawh a awm - khingpui penalty box-a ball khawih tam a duh thu a sawi chu player-ten an zawm a, Albania laka vawi 34 chiah khawih khan Latvia lakah vawi 69 an khawih thei.
Three Lions hian 73.5% zet ball an chang a, vawi 36 cross an nei bawk - mahse, an beisei finishing tawih erawh hmuh tur a awm lo a, Three Lions hian Kane piahlamah forward 'form' tak an mamawh a, Marcus Rashford, Jarred Bowen leh Phil Foden ten beisei an phak lo vek.