Ivory Coast-in World Cup an hnaih

World Cup 2026 khel turin Ghana chuan kawng dik an zawh zel - Thawhlehni zan khan World Cup qualifier an khel a, khualmualah Madagascar chu 3-0 ngawta sawpin, khawvela inelna ngaihhlut hlawh ber an hnaih ta hle.

Ghana tan Arsenal midfielder Thomas Partey chuan goal hnih khungin, West Ham winger Mohammed Kudus chuan goal khat a thawh bawk. Ghana hi Group I-ah awmin, match ruk an khelh tawhah vawi nga an chak a, vawi khat chiah an la tlawm. Table chung ber an luah mek a, anmahni hnaih bertu Madagascar aiin point ngain an sang zawk.

Hetihlai hian Ivory Coast pawh an chak a, kawng dik an zawh zel - Thawhṭanni zan khan World Cup qualifier-ah an mikhual Gambia chu 1-0 in an hneh a, group hmahruaitu an nih chhunzawm.

Ivory Coast tan Sebastian Haller chuan inkhela goal awmchhun a khung a, Gambia lam hian a chhanletna tur an neih loh avangin Ivory an chak - match ruk an khelh tawhah tlawm an la nei lo a, vawi nga chakin, vawi khat draw an nei.

Hetihrual hian Ivory hi ngaihngam taka la awm thei an ni rih lo. An hnuai chiaha awm Gabon aia an sanna hi point khat chauh a ni - Gabon hi an intawn hmasakah 1-0 in an hneh tawh a, September international break-ah an la intawn leh dawn avangin an la him lo.

Africa hian World Cup-ah team pakua an thawh thei a, inter-confederation playoff kaltlangin hmun khat luah theihna an la nei bawk - ram 53-in heng hmun ruak hi an inchuh a, group A-I (9) ah, team paruk zel awmin an inṭhen hrang a, group tina a sang ber chu World Cup khel tura tling nghal tur an ni.

Group tina pahnihna tiṭha zual palite chuan second round hmachhawn lehin, knockout tournament hmangin inter-confederation playoff khelh an inchuh ve leh dawn a ni.