A vawi hnih nan Poland chak

Poland-in World Cup 2026 khelh ngei an tum - Thawhṭanni zan khan an mikhual Malta chu 2-0 in an hneh a, match hmasa zawkah Lithuania chu 1-0 a lo hneh tawh bawkin, qualifier match hnih an khelh aṭangin point ruk an nei ta.

Warsaw khawpuia inkhelah Poland tan Karol Swiderski chuan goal hnih khungin, Malta lamin a chhanletna tur an nei lo - hun pek belhah winger Ilyas Chouaref hnawhchhuah zui a ni a, ram tana a match hnih khelhna chauh a ni!

Kum 24 mi winger hi Swiss Super League club Sion tana khel niin, France tan age level-ah a inlan tawh a, Maltese thisen kai niin, February 2025 khan Malta tana inlan a thlang - tun international break-ah ram tan koh nghal a ni a, match hniha an chak loh ve ve bakah red card a hmu tel bawk a, international football-a a tawnhriat hmasa hi a ropui lo hle.

He inkhelah hian Malta tan James Carragher a inlan bawk - ani hi Liverpool defender hlui Jamie Carragher-a fapa a ni a, kum 22 mi centre back hian League One lamah Wigan Athletic tan a khel mek.

James-a pa Jamie Carragher-a pu (a nu pa) Paul Vassallo chu Malta mi niin, a pu kaltlang hian James hi Malta tan a inlan thei a, February 2025 khan a pa nen Malta khua leh tui nihna pek an ni.