Hma lam panin Zverev a kal

A tir lamah khel ṭha tawk lo mah se Alexander Zverev chu huaisen takin a tho chhuak a, nimin zing Miami Open fourth round inkhelah Jordan Thompson hnehin last 16 a inhlangkai.

Hard Rock Stadium-ah Zverev hian Australian tlangval Thompson hi 7-5, 6-4 in a hneh. Set hmasa zawkah 4-1 ngawtin a hnufual hman a, a service ngei pawh a hum thei lo - mahse game khat chauh hloh zuiin set latu zawkah a ṭang.

Indian Wells an khelh ṭum khan Zverev hi hneh nei loin a tla nghal, tun ṭumah erawh a kaltluang mek - a elpui hautak tur Carlos Alcaraz a tlak tawh avangin nomawi chawi theihna kawng a inhawng zau hle tura ngaih a ni.

Seeded pakhatna Zverev chuan, "Jordan kha player ṭha tak mai a ni a, ka tan kawng kha a harsa em em a ni. Ka khelh dan phung pangngai nei let turin ka bei nasa, set khatna tawp dawn lamah kawng dik ka zawh thei chauh," a ti.

Inkhel dangah seeded pathumna Taylor Fritz chuan Denis Shapovalov chu 7-5, 6-3 in a hneh. American player Fritz hian set khatnaah 5-2 in hma a hruai a, tualbuai chhunzawm deuh zeuh mah se set hloh lo tawkin a inchhanhim.

Australian tlangval Alex de Minaur pawhin Joao Fonseca chu 5-7, 7-5, 6-3 in a hneh. Brazilian rawlthar Fonseca hi kum 18 mi chauh a la ni a, stadium chhungah Brazil hnam puanzar keng ṭantu nei tam hle mah se a chak lo zawkah a ṭang a ni.