Milwaukee Bucks hnehtu Phoenix Suns

NBA regular season kal laiah, nimin zing khan Phoenix Suns chuan Milwaukee Bucks chu 108-106 in an hneh - Suns an chak theih nan Devin Booker chuan hun tawp dawn a pawimawh lai takah basket a nei a, a team a chakpui.

Suns thiampuipa Kevin Durant chuan point 38 a neih bakah rebound vawi riat a la a, assist vawi nga a nei bawk. Booker pawhin point 19 leh assist vawi 12 nen double-double a nei a, an pahnih hian an chak theih nan an thawh hlawk hle.

Phoenix Suns hi Mike Budenholzer-a enkawl an ni a, kum 2020-21 khan Budenholzer hian Bucks chu NBA title a lo lak pui tawh, mahse 2022-23 season khan an ban, tunah a club hlui hmachhawnin a hneh leh ta a ni.

Bucks thiampuipa Giannis Antetokounmpo chuan point 31 a neih bakah rebound ṭum 10 a la tling a, mahse a team chakpui nan a tawk zo ta chuang lo; playoff khel thei dinhmunah ding mek mah se, chesual thei an la nih ve tho avangin tun hnaiah insiamṭhat an mamawh.

Inkhel dangah Orlando Magic chuan Los Angeles Lakers lakah 118-106 in hnehna an chang. Lakers tan hian LeBron James (24 points) leh Luka Doncic (32) te inlan kawp thei mah se team chakpui nan a tawk zo chuang lo a ni.

NBA regular season a zo hnai a, a sang zual pariatte chauhin playoff an khelh dawn avangin boruak a nung chho hle. NBA team 30 te chu conference pahnihah ṭhen hran an ni a, conference champion an zawn hnuah NBA Finals an khel leh ṭhin a ni.