Nakkum July thlaah World Athletics Championship
World Athletics Championship chu kumina neih tur ni mah se thla 11 zetin sawn tlai a ni a, nakkum July thlaa neih tur a ni - Tokyo Olympic nen a hun insu buai lo tura ruahman a ni.
World Athletics chuan inelna hi July 15-24 chhungin Eugene, Oregon-ah neih a ni dawn tih an sawi chiang. World Championship hi ruahman dan chuan kumina neih tur a ni a, coronavirus vangin nakkum atan hian an sawn hla.
A hun an sawn hlat hmasak chu nakkum August 6-15 a ni. Mahse, Tokyo Olympic chu July-August chhunga neih tura sawn a ni ve leh a, hei vang hian World Athletics Championship neih hun tur an sawi tawh hi a vawi hnih nan tih danglam a ngaih phah.
World Athletics president Sebastian Coe chuan, "A hun kan siamrem leh hian mimal Olympic nena tel kawp duh tan pawh harsatna a siam lo tura ngaih a ni," tiin a sawi.
World Championship hnuhnung ber chu nikum khan Doha-ah neih a ni a, kum 2023-a neih leh tur chu Budapest-in a thleng ve thung ang.