Engmah sawi lawk theih a ni lo - Marquez

MotoGP season thar an hmang chho mek a, intlansiak pahnih an hmachhawn tawh chinah Marc Marquez a chak ve ve - Spanish rider chuan champion tur sawi hun a la ni lo tih a sawi.

Marquez hi a team thar Ducati Lenovo nen an inngeih dawn hle niin a lang, a hliam a dam chiang tawh bawk; tun hma lama a ropuina ang kha a nei let leh ngei dawn ni pawhin a lang.

Mahse,kum 32 mi Marquez a la ṭawng fimkhur hle, "Tunah hian intlansiak 22 awm tur zinga pahnih chauh ka la tlan, a bul kan ṭan chho chauh a ni. Thil thleng thei a tam em em a, chetsual leh vanduaina thleng thei a tam tih chu a hma pawhin ka lo hre tawh.

"Ni khat lekah kan dinhmun hi a inthlak danglam duai thei, chuvangin tumah hi dinhmun ṭha leh ṭha lo bik sawi hun a la ni lo a, champion tur phei chu sawi rik chi a la ni lo," tiin a sawi.

Bike intlansiakna sang berah Marquez hi vawi ruk ngawt a champion tawh, mahse hlawhtlinna a chan hnuhnung ber chu kum 2019 daih tawh kha a ni, hliam leh harsatna hrang hrang vangin hun rei tak chhung chu midang hnungah a awm.

Mahse, rilru paukhauh leh beidawng mai duh lo mi a ni a, a team hmasa Repsol Honda nena an inremna an tihtawp hnuah Ducati Lenovo a zawm, bike intlansiakna sang huangah hian a nau Álex Márquez nen rider hmuhnawm an ni mek.