Coach ṭha ber atan Inzaghi

Inter Milan coach Simone Inzaghi hnenah Panchina d’Oro hlan a ni, he chawimawina hi Italy ram chhunga football inelna huangah coach ṭha ber hnena an hlan ṭhin a ni.

Season hmasa khan Inzaghi hian Inter Milan chu Serie A nomawi a chawipui a, inelna lian Champions League-ah hlawhtling chiah lo mah se team hmuhnawm leh hlauhawm zinga mi an ni phak.

Award dawng tur hi chanchinbu miten an tlan niin, Inzaghi hian vote 26 a hmu; amah hnaih bertu Atalanta coach Gian Piero Gasperini chuan vote 14 a hmu thung - Inzaghi hi a sang fal hle.

Italian coach Inzaghi tan Panchina d’Oro hmasa ber a ni a, Inter Milan coach zingah Antonio Conte (2020-21) hnua he chawimawina dawng leh thei hmasa ber a ni bawk.

Italy rama coach ṭha chawimawina hunah hian Carlo Ancelotti chu lifetime achievement award pek a ni, an ramah team enkawl lo mah se a bik takin chawimawina an buatsaihsak a, a tan chuan a hlu bik hle ang.

Real Madrid manager Ancelotti chuan, "Ka tan chuan thil hlu danglam tak a ni, keimah ang bawka coach ni ve thoten duhsak tak maia hetiang hun min siamsak hi a hlu," a ti a, an rama hna a thawk lo chunga chawimawi a ni chu a ngaihlu hle.

Award semna hunah hian - Antonio Conte, Pippo Inzaghi, Gian Piero Gasperini, Cladio Ranieri, Cesc Fabregas, Fabio Cannavaro leh Raffaele Palladino te pawh an inlan a ni.