Coco Gauff zinkawng a tawp

Tennis inelna Miami Open 2025 khelh laiah Coco Gauff chu last 16 paltlang zo loin a tla - American nula a chak loh lai hian Aryna Sabalenka, Iga Swiatek leh Emma Raducanu te erawhin an khingpui ṭheuh an hneh thung.

Nimin zing inkhelah Coco Gauff hi chak tura rinkai zawk a ni a, mahse seeded pawh chang phak lo Magda Linette lakah 6-4, 6-4 in a chak lo, seeded pathumna Gauff hian match dang anga service a neih ṭhat tawk loh chu a tuar.

South Florida-a inkhel entuten Linette hi an au nasa hle a, a beisei phak bak ṭantu a nei tih a chiang - a match lehpekah chuan Jasmine Paolini a hmachhawn ang. Italian nula Paolini hian inkhel dangah Naomi Osaka chu 3-6, 6-4, 6-4 in a lo hneh ve bawk.

Grand Slam vawi li champion tawh Osaka hian fa a neih leh hnuah tennis a khel leh a, mahse tun hma lama a ropuina ang kha a nei let thei mai tawh lo, kum 27 mi chauh a la nih avangin ṭha taka khel chhuak leh tur erawhin hun a la nei.

Inkhel dangah Aryna Sabalenka chuan a khingpui Danielle Collins lakah zahngaihna a lantir lo - Belarus star hian vawi 23 ngawt mai winners vaw chhuak chungin 6-4, 6-4 in a hneh a, quarterfinal-ah chuan Qinwen Zheng a hmachhawn leh ang.

Zheng hian Ashlyn Krueger chu 6-2, 7-6(3) in a lo hneh ve thung - Chinese player Zheng tan Sabalenka hmachhawn hi thil awlsam a ni dawn lo, vawi nga an inhmachhawn tawhah Zheng hian chak ni hmel a la hmu ve ngai lo a ni.

Raducanu pawhin kawng dik a zawh chhunzawm ve zel - British nula hian Amanda Anisimova lakah a service a hum ṭha hle a, service hmasa zawk zelah phei chuan point hloh miah lo chungin 6-1, 6-3 in a chak; kum 22 mi tan result ṭha bik a ni ngei ang.

Nimin zing khan Iga Swiatek pawhin player ṭha Elina Svitolina chu 7-6(5), 6-3 in a hneh a, Ukrainian nula hi vawi 13 a hneh tlinna niin, an intawn tawh hoah ṭum khat chak loh a nei ve thung. Miami Open-ah hian player ṭha an inlan tam avangin nomawi inchuh boruak a sang zel dawn a ni.