Aizawlah silai inkahsiak nei dawn

R. Laldawngliana Memorial 19th Aizawl District Inter Club Shooting Championship chu March 27, Ningani aṭang hian neih ṭan a ni dawn a, March 29, Inrinni thleng a awh ang.

Aizawl District Rifle Association (ADRA) buatsaiha neih tur inelna hi Mualpuiah neih tur niin, indoor event-a 10m Air Rifle leh Air Pistol intihsiakna chu MRA Shooting Gallery, R. Dengṭhuama Hall-ah neih a ni ang a, outdoor hi 3rd Bn MAP Firing Range, Mualpuiah neih tur a ni thung.

Outdoor intihsiaknaah hian 50m Air Rifle Bench Rest, 35mm Air Rifle Sitting leh 10m Air Rifle Standing te a ni dawn a, ADRA chuan Aizawl District chhunga Shooting club 19 aṭangin silai kap thiam mi ṭhahnem tak an tel an beisei thu an sawi.

Inelnaah hian kum bithliahin silai kap thiamte ṭhen hran an ni dawn a, sub youth, youth, junior, senior, master, senior master leh super master category-ah te ṭhen a ni ang a, Mizoram State Shooting Championship lo la awm tura Aizawl District aiawh tur thlanna a ni nghal dawn bawk a ni.

ADRA chuan intihsiaknaah hian a duh apiang tel theih a nih thu an sawi a, "Silai kap ngai lote tan bul ṭanna remchang tak a nih dawn avangin a tam thei ang ber tel turin kan sawm a ni," an ti a, a hmunah silai leh a mu hman tur a awm dawn avangin silai nei lo tan pawh harsatna a awm dawn lo.

Hriatchian duh nei tan 9774386685/9436141066-ah te zawhfiah theih a ni.