Wimbledon-in pound maktaduai 100 vel hmu dawn
Indopui II-na hnu lama a vawi khat nan Wimbledon khelh a ni dawn lo a, grass court inelna lian hi neih theih ni dawn lo mah se All England Club chuan insurance lam aṭangin pound maktaduai 100 chuang an hmu dawn tho!
All England Lawn Tennis Club (AELTC) chuan inelna an neih loh avanga an sum hloh tur ang hi chipchiar takin an chhut a, heng an sum hloh tur hi hmuh let theihna turin ruahmanna fel tak an lo siamsa vek tihna a ni.
AELTC chuan, "Britain rama tennis ngainatu leh khawvel huapa player zawng zawngte tan channa nasa tak a ni tih kan hria. Hnathawktu leh sumdawnna lama a nghawng theih zawng zawngte chu kan tuarpui hle," an ti.
Tennis season kal laia Grand Slam khelh tur pali zingah Australian Open chiah an la khel a, May thlaa khelh tur French Open chu a hun sawn tlai a ni tawh. September thla hian US Open chu New York khawpuiah khelh theih beisei a ni.