James-a'n inkhelh a nghakhlel
Los Angeles Lakers star LeBron James chuan Nilaini khan video conference hmangin thuthar thehdarhtute a kawm a, hri leng hneha basketball khelh leh a chak tawh thu a sawi.
March 11 aṭang khan NBA chu tiam chin awm loin an chawl lailawk. Western Conference lamah Lakers hian hma hruai mekiin, an conference lamah regular season match 19 khelh hmabak nei chunga playoff tling tawh awmchhun an ni hial.
James chuan, "Team indin thar kan nihna chen a la awm a, kan khelh dan leh kalphung pawh bel tawk loh lai kan la nei a ni mai thei. Mahse regular season kan hman dan hi chu a lungawithlak hle.
"Player thar, coach thar leh ruahmanna thar. A bik taka New Orleans tana season sarih hmangtu Anthony Davis kan nei thar bawk, ani hian tun hma lama a khelh ṭhan pui ngai loh bulah a khel a ni," a ti.
American tlangval James chuan sawi zawmin, "Season hman lai hi ṭha takin kan chhunzawm leh thei ngei ang tih ka sawi lawk ngam lo. Tih ṭhin dan pangngaia khelh theih erawh ka chak tawh takzet," tiin a sawi bawk.
Season an tih tawp lailawk hma thleng khan James hi NBA player langsar ber zinga mi a ni. Match a khelh apiangin point 25.7, rebound 7.9 leh assist 10.6 nei ziah anga chawh rual theih a ni a, basketball a khelh hun chhunga assist a neih ṭhat ber season a hmang.
NBA Most Valuable Player atana vawi li thlan tawh James hian Lakers hi a chamion pui a nih chuan a vawi nga nan MVP a nih pawh a rinawm. NBA champion vawi thum ni tawh hi All Star zingah ṭum 16 a tel tawh bawk.