Real Madrid player-ten hlawh la tlem dawn
Spanish club lian Real Madrid player, coach leh director-te chuan coronavirus hri leng vangin an hlawh an tihniam dawn a, kumin chhung atan 10-20% in an hlawh hi tihhniam a ni ang.
March aṭang khan Spain-ah hian football chawlh hman a ni tawh. Real Madrid chuan season khelh chhunzawm theih a nih loh chuan hlawh hi 20% a tihhniamin an kalpui ang a, season khelh chhunzawm theih a nih erawh chuan 10% a ni dawn thung a ni.
Spanish club lian chuan thutlukna chu an club hnuaia player, coach-te leh hnathawktute hmalakna avanga nei thei an nih thu a sawi a, non-playing staff-ten harsatna an tawh loh nana hma chu la an nih thu an sawi bawk.
Real Madrid hi football team bakah basketball team chuan an hlawh lak hi an tihniam ve dawn bawk - thla hmasa khan Real elpui Barcelona player-te chuan 70% in an hlawh an lo tihniam tawh a, non-playing staff ten hlawh 100% an lak theih nan a hranpain sum an thawh bawk a ni.
Spanish football hi Covid-19 hri leng vangin dinhmun hlauhthawnawm takah a awm mek a, La Liga president Javier Tebas chuan season hi khelh chhunzawm theih a nih loh chuan Spanish football chuan pound maktaduai 880 vel a chan tur thu a sawi.