Shearer-a'n United a hnawl, Alex-a'n a chhang lo
Premier League ṭan hnua English club ropui ber chu Manchester United an ni a, manager ropui ber chu Sir Alex Ferguson a ni a, goal khungtu ropui ber chu Alan Shearer a ni. English striker piang tawha mi tam takin bera an chhal Shearer chuan tun hnai khan Ferguson-a'n Old Trafford zawm tura a sawm chungchang leh Newcastle a zawm tak dan chungchang ngaihnawm takin a sawi chhuak.
Shearer hian kum 1996 nipui khan Blackburn chhuahsana chona lian zawk hmachhawn a tum a, hemi ṭum hian ni khat thil thuah Red Devils boss Ferguson leh Newcastle United manager Kevin Keegan te a hmu ve ve. English striker hian United zawm tumin thlutlukna siam tum mah se a naupan laia a club ṭan Newcastle zawm a thlang tak zawk.
Hei le, Shearer-a thukhawchang chu
Cheshire-ah ni khat chhung lekin Kevin Keegan leh Sir Alex te ka hmu ve ve a. In awih lo mai thei, ka hmuhna hmun hi David Platt-a nupui nu te inah a ni.
Zing lamah Kevin Keegan ka hmu a, boruak a ṭha hle. Kevin hote an chhuak a, Manchester United an rawn kal. Sir Alex-a min zawhna hmasa ber chu, "Nangmah hmutu hmasa ber nge ka nih pahnihna zawk?" tih a ni a, zingah Kevin-a ka hmuh tawh thu ka hrilh hnua a thusawi erawh sawichhuah ka duh lo.
Chutah chuan Sir Alex chuan, "Chuti a nih chuan kan tan chuan beisei tur a awm lo," tiin a sawi. A nihna takah chuan min hmuh hmasak ber loh avangin a lungawi lo a ni ber a, kan inbiakna erawh a kaltluang hle.
Penalty ka pet thei ang em tih ka zawt a, Sir Alex chuan, "Cantona kutah a awm," tiin min chhang a, kei chuan, "Ka hria alawm, ka pet thei ang em?" tiin ka zawt nawn leh a. Chutah chuan hriam takin min en a, "Eric Cantona ka hrilh lo ang," tiin min hrilh.
Thutlukna siam a ṭul ta a, Manchester United zawm tur ang hialah ka inngai a, 90% velin ka thutlukna hi a chiang tawh. Ni hnih khat hnuah Kevin Keegan-a'n min rawn be leh a, chutah chuan ka seilennaa kir ka thlang ta zawk.
Ka naupan lai aṭanga ka ṭan tawh an ni a, ka khelh châkna a ni sa bawk. Inchhirna ka neih leh neih loh in hre châk ngei ang. Ka dinna chu, "Inchhirna ka nei lo. Thutlukna siam nawn leh thei pawh ni ila, ka thutlukna ngai bawk hi ka siam leh tur a ni."
Newcastle zawm tura thutlukna ka siam hnu hian Manchester airport aṭangin pre season tour nei turin kan thlawk chhuak dawn a, Sir Alex hnenah thutlukna hrilh ka duh. Airport ka pan pahin ka call a, min chhang lo. Message thawn ringawt chu dik loa ka hriat avangin biak ka tum leh a, min chhang ta chuang lo.
Min chhang dawn chuang loa ka hriat avangin message ka thawn ta a, rin lawk ang ngeiin min call let lo.