Bayern zawm duh lotu Reus
German player ṭha zawng zawng chuan Bayern Munich tana khelh an chak vek emaw tih tur a ni a, Bundesliga champion hian an player duh zawng chu an la deuh zel bawk - Marco Reus erawh a rilru a danglam.
Borussia Dortmund captain Reus chuan Bayern zawm theihna hun nei mah se a hnar, a club khelh mekna tana rinawm taka khelh chhunzawm chu a duhthlanna a ni ta zawk tih a sawi.
Jurgen Klopp kaihhruaina hnuaiah Dortmund hian 2011 leh 2012 khan Bundesliga nomawi an chawi, hlawhtlinna an chan theih nana player pawimawh - Mario Gotze, Robert Lewandowski leh Mats Hummels te chuan Bayern an zawm.
Mahse, heng player ṭha pathum hi zinga pahnih Gotze leh Hummels te chu Allianz Arena aṭangin Signal Iduna Park-ah an kir leh tawh. Reus pawh hi Bayern lak duh zinga mi a lo ni ve tawh ṭhin.
German international Reus chuan, "Sawmna ka dawng, sawmna duhawm tak pawh a ni. Bayern Munich hian hun rei tak chhung chu min rim ve tawh ngei mai. Mahse, kei chuan BVB tana khelh hi a hlu ka ti.
"Borussia Monchengladbach tana ka khelh lai khan thutlukna ka siam tawh, club ka sawn a nih chuan Dortmund-ah chauh a ni ang, tun thlengin chutah chuan ka ding nghet," tiin a sawi.
Kum 30 mi Reus hi player ṭha leh beiseiawm tak a ni ṭhin, hliamin a tih buai ngun avang erawh chuan a nihna tur ang tak a ni phak lo deuha ngaih a ni. Season hmasa khan league nomawi chawi teuh viau mah se a tawp lamah an chesual a, kuminah pahnihna an ni mek.