Premier League player ropui Shearer

Amaherawhchu English football tuichilh chuan Premier League-a goal 260 khungtu Shearer hi an hriat ngei a ṭul. A khel lai hmu pha erawhin Shearer-a hming a rik rualin goal a khung zawha a ban ding lam phar chhuak a, goal khung a lawm lai an hriatchhuah nghal a rinawm.

Alan Shearer hi August 13, 1970 khan Newcastle upon Tyne-ah Alan Shearer Sr leh Anne Shearer te inkarah a piang. Gosforth Central Middle School leh Gosforth High School-ah lehkha a zir a, hetihlai aṭang tawh hian Shearer Sr hian a fapa hi football khel turin a fuih a ni.

A naupan laiin Shearer hi kawngpuiah te a inkhel nasa a, ball chan tam theihna a nih avangin midfield-ah a khel ṭhin. A rualpui zingah pawh a filawr a, school captain ni pha a ni. Newcastle stadium St James' Park-ah Shearer hian a captain-na hnuaiah an school chu seven-a-side tournament-ah a champion pui a, hetah hian hriat a hlawh ṭan.

Amateur club Wallsend Boys Club a zawm a, heta a khelh lai hian First Divison club Southampton scout Jack Hixon chuan a hmu fuh a, hetihlai hian Premier League a la awm lo. Shearer hian club lar dang West Bromwich Albion, Manchester City leh Newcastle United-ah te trial hlawhtling takin a nei a, amaherawhchu Jack Hilton hian a duh em avangin kum 16 mi Shearer hian Saints a zawm.

Alan Shearer hian youth team-ah kum hnih hun a hman hnuin first team-ah dah chhoh a ni a, Southampton-in March 26, 1988-a Chelsea an hmachhawn ṭumin a inlan ṭan. Kar hnih hnu lekah tun hmaa Southampton khelmual ṭhin 'The Dell'-ah hattrick siam zuiin Arsenal 4-2 in an hneh.

 

Shearer hi kum 17 leh ni 240 mi chauh a ni a, top flight football-a hattrick siam thei naupang ber Jimmy Greaves-a record kum 30 ding tawh chu a khum. English striker hian a season hmasa berah goal dang khung belh tawh lo mah se professional contract an zawrh nghal. Shearer hian kum nga chhung Saints tan a khel a, Premier League ṭan hma season-ah goal 13 khungin striker chhawr tlaka chhiar theih a ni ta bawk.

Saints tana a khelh ṭhat avangin Shearer hian Alex Ferguson-a mit a la tawh a, amaherawchu hetihlai hian Manchester United hi a la lian tawk lo. Blackburn lamin Shearer lak nan sum an seng huai a, British football history-a player manto ber ni turin kum 1992 khan pound maktaduai 3.3 hmangin an lalut.  Blackburn-in English striker ṭha an lakluh theih nan sumdawng hausa Jack Walker a ṭangkai a, kum 1994 khan Walker inphalna zarah record bawkin Chris Sutton chu Norwich aṭangin pound maktaduai 5-in an lalut leh bawk.

Shearer hian league match hmasa berah match 21 chauh khel chungin goal 16 a khung a, hemi hnu season thumah goal 30 a khung tling vek. 1994-95 khan Blackburn Rovers chu Premier League-ah a champion pui a, Shearer hian league-ah ringawt goal 34 a khung. Player manto pahnin inkawp Shearer leh Sutton te an che ṭha a, SAS hminglem pek an ni.

Kum 1996-ah England-in Euro C'ship an thleng a, Shearer hian goal nga khungin Golden Boot a dawng. FIFA World Player of the Year leh Ballon d'Or chawimawinaah pathumna ve ve a hauh a, sawmtu pawh a ngah. Hemi kum hian Shearer-a'n Manchester United zawm turin ngaihtuahna a seng hman a, amaherawhchu a club hmangaih Newcastle United a zawm ta zawk.

Alan Shearer hian Manchester United zawm se Premier League nomawi tam zawk a chawi ngei ang. English striker hian a seilenna khaw club Newcastle tana khelh a thlang a, nomawi chawipui lo mah se goal 206 khung sakin a thutluknaah inchhirna a nei lo.

English striker hi football tana a hnathawh ropui tak avangin kum 2016 khan UK-a mimal chawimawina sang pathumna Commander of the Order of the British Empire (CBE) pek a ni. Hemi ṭum hian Shearer Senior pawhin a fapa hi a chhuan thu a sawi.

Newcastle legend chuan, "Ka pa hian tun hmain min chhuan thu a la sawi ngai lo. Chawimawina ka dawn ṭumah erawh min chhuan thu hi min hrilh," tiin a sawi. A duhthusam sawi zuiin Shearer chuan, "Newcastle tana khelh a, ka nu leh pa hmaa goal khung kha ka suangtuah a ni  ṭhin. Ka duhthusam ka ti hlawhtling hi ka lawm hle," tiin a sawi. Shearer hi football a khelh lai zawng khan a pa Shearer Sr hian a chhuan thu a hrilh lo!

Football-a hun tawn nuam ber sawiin Shearer chuan, "Jackie Milburn record ka khum ṭum kha football khelmuala nuam ka la tih ber ṭum a ni," tiin Newcastle record a siam theih avanga a hlim thu a sawi. Milburn hian Newcastle tan competitve match-ah goal 200 a khung a, he record hi Shearer-a'n February 2006 khan a khum a ni.