Covid-19 do turin Premier League player
Sawiselna tam tak karah Premier League player-te chu Covid-19 do turin an lo pen chhuak ta a, #PlayersTogether tih hming puin ṭanpui ngaite an ṭanpui ṭhin dawn a ni.
Premier League player-te hian an pawl hmang hian sum an tuak ang a, an sum tuak aṭanga pawisa awm te hi National Health Service lamah a mamawhte puihna turin an chhung lut ṭhin dawn.
English top flight football-a player-te hian NHS hnuaia Charities Together (NHSCT) chu an thawhpui dawn a, hetianga thawhhona kalpui a nih theih nan hian Liverpool captain Jordan Henderson chuan nasa takin hma a lo la tawh.
Hmalakna chu
Premier League player-te hlawh ti hniam tura nawr leh sawisel an nih hma aṭang tawh khan Jordan Henderson chuan hmalakna a lo kalpui tawh a, engemaw kawng zawng tala tha an thawh ve theih beiseiin Premier League club-a captain dangte chu a dawr kual.
Indawrna kalpui reng a nih hnuah Premier League captain 20-ten player dang aiawhin inremna an siam ta a, an sum hmuhte hi Reds captain Henderson, Manchester United captain Harry Maguire, Watford captain Troy Deeney leh West Ham captain Mark Noble te chuan an buaipui ang.
#PlayersTogether sum hmuh tur hi player-te thawh khawm tur aṭangin a ni ber a, "Harsatna kan tawh mekah danglamna kan thlen ngei theih beiseiin hetiang hian hma kan la a ni," an ti a, sum hmuhchhuah hi tam tham hle tura ngaih a ni.
A chhehvel
Premier League club-te chuan an player-te chu 30% hlawh ti hniam turin an lo ngen tawh a, mahse he ngenna hi England-a footballer intelkhawm pawl Professional Footballers' Association chuan an pawm lo.
PFA chuan an hlawh 30% a tih hniam hian an chhiah pek a tih hniam duai tur thu an sawi a, hei hian sorkarah nghawng ṭha lo tak neiin a tuar ber tur chu NHS an nih thu an sawi.
Premier League club-ten 30% hlawh ti hniam tura player-te an ngen hma hian Henderson hmalaknain player-te hian sum thawh khawm dan tur an lo rel daih tawh a, PFA ṭanna hi a dik zawk niin a lang.
An lawm ve ta
Premier League player-te midang ṭanpui turin an che tawk lo tia na taka lo sawisel tawhtu UK health secretary Matt Hancock chuan player-te thutluknain a tih lawm thu a sawi a, "Thinlung takin an hmalakna hi ka thlawp a ni," a ti.
England legend Gary Lineker chuan, "Ka lo beisei lawk ang ngeiin footballer-te chu midang tan an luang chhuak dawn a ni," tiin a lawm thu a sawi a, "Midang pui thei dinhmuna ding, Premier League player-te ang lo taka ngeiawm taka an phut ve ni lem lo te pawh midang pui tura an luanchhuah ka beisei," a ti zui deuh kher!
NHS Charities Together chief executive Ellie Orton chuan, "Hah pawh sawi loa midangte nun chhanhim tura inpe NHS staff leh volunteer-te tan thu lawmawm tak an thlen a ni," tiin player-te hmalakna chu a fak - UK-ah hian coronavirus vanga thi mi 7,000 an chuang tawh a ni.