MN Enterprise Women's League final-ah Mizo Football News Vs Kulikawn FC

MN Enterprise Womens's League semifinal chu nimin khan Lammualah khelh a ni a, champion lai Mizo Football News leh Kulikawn FC ten hnehna an chang. MFN hian 5-0 in LM FC, Durtlang an sawp a, Kulikawn FC-in Springfield HSS 1-0 in an hneh hram bawk. Final hi March 29, Inrinni chawhnu dar 2:00 hian Lammualah khelh a ni ang.

Semifinal hmasa zawkah coach tawnhriat nei ṭha Lalsangzuala Hmar-in player pawimawh Lalhruaizeli Khiangte (Nupuii) leh Lalthansangi te chhawr thei lo mah se buaina an tawk lo a, group match hnuhnung bera 1-0 chauha an hneh LM FC an sawp. Semifinal-ah hian Lalduhthlani Pachuau-in goal hnih a khungin Sarah Lalṭhazovi, Vanlallawmawmi leh Baby Lalchhandami ten goal khat ṭheuh an khung.

Group match hnuhnung berah Springfield HSS, Republic Vengin Kulikawn FC 3-2 in hneh mah se semifinal-ah erawh Mizo hmeichhe football-a finishing nei ṭha ber zinga mi Lalrinmuani chu danglamna thlentu a ni. Inkhel inhnehtawk takah Rinmuani'n minute 52-naah goal awmchhun a khung a, Kulikawn FC-in 1-0 in hnehna an chang.