Atletico kutah Griezmann a innghat

Antoine Griezmann chuan Atletico Madrid-a a hma hun turah thutlukna a siam fel tawh niin Spanish media-te chuan an tarlang a, amah duhthlannaah chuan kum 2026 thleng Madrid khaw club-ah hian cham a duh.

Griezmann hian amah maia thutlukna siam erawh a tum lo a, Atletico thuneitute kutah a innghat - Spanish club thuneitute hian a chhuah chu club tana ṭha zawkah an ngai a nih chuan chhuahsan a hreh lo.

French forward hian Real Sociedad aṭanga a professional zinkawng zawh ṭanin, kum 2014 khan Atletico hi a zawm a, kum 2019 thleng a khelh hnuah Barcelona a zawm.

Barca-ah hian season hnih chamin, beisei a phak loh hnuah, kum 2021 khan loan-a khel turin a kir a, season khat hnuah a loan hi pawhsei niin, October 2022 khan a ngheta khel turin Atletico-ah hian contract thar a ziak.

Kum 34 mi forward hian kum 2026 thleng khel turin Atletico-ah hian contract a nei a, mahse, club tana ṭha tur zawk a nih chuan club danga kal a pawi ti lo a ni ber.

Griezmann hian Los Colchoneros (Atletico sawina) tan tun season inelna hrang hrangah match 42 khelin goal 16 a khung tawh a, assist vawi sarih a nei bawk. Mahse, Atletico hian Julian Alvarez leh Alexander Sorloth an nei bawk a, season tharah chuan Griezmann tan hmun pawimawh chan reng a harsa mai thei.

France tana World Cup nomawi chawi tawh forward hi MLS club-ten an thlithlai mek nia sawi a ni a, a contract-ah hian euro maktaduai 15-a leichhuah theihna dan a awm.

Griezmann hian Europe-ah chuan Atletico ni lo, club dang zawm a tum loh thu a lo sawi tawh a, club football-a league nomawi la chawi miah lo forward chuan, "Sawmna chu ka dawng ngei a, mahse, Atletico-a cham ka duh.

"Atletico-a kir a, fan-ten min pawm leh theih nan hian theihtawp ka chhuah a, Europe-a ka club hnuhnung ber ni turin he club hi ka duh a ni," tiin a lo sawi tawh a, Atletico-ah a contract a hmang zo lo a nih pawhin USA lamah a kal hmel hle.